NRK Meny
Normal

Leigga gearggus vuolgit ohcat láhppon olbmo

Láhppon bivdomátkkálaš gean ohcanveahka lei ohcamin Njivlovuomi guovllus Guovdageainnu márkanbáikki davábealde, lea gávdnon heakkas.

Guovdageainnu Rukses Ruossa

Guovdageainnu Rukses ruossa ovddasteaddji guovttos, Isak Ole Hætta ja Svein Ole Klemetsen leigga gearggus vuolgit ohcánbáikái go bođii diehtu ahte láhppon olmmái lei gávdnon heakkas.

Foto: Ronald Pulk / NRK

Politiijat dieđihit NRK:ii ahte dearvvašvuođabargit dál leat iskamin dievddu dearvvašvuođa maŋŋil go son gávdnui.

Dieđihii olbmá láhppon

Guokte lullinorgalačča leigga bivdomátkkis davábealde Guovdageainnu, go nubbi ii šat dihtton. Láhppon dievddu bivdoustit ohcagođi olbmás, muhto go ii gávdnán su, de son dieđihii olbmás láhppon.

Politiijat ledje bivdán veahki sihke Rukses ruossas, ja ohcanveagas geain leat beatnagat. Buohkat ledje gergosat vuolgit ohcanguvlui, muhto de ožžo dieđu ahte helikopterveahka lei gávdnan dan láhppon dievddu.