NRK Meny
Normal

Lágádushoavda cuiggoda Keskitalo giela

Iđut lágádusa beaivválaš jođiheaddji, Åge Persen, mielas lei heahpat gullat sámediggepresideantta ođđajagisártni.

Aili Keskitalo og Åge Persen

Lágádushoavdda Åge Persen (govažis) lei njuolgut heahpat gullat sámediggepresideantta Aili Keskitalo ođđajagisártni.

Foto: Fotomonasje: Dan Robert Larsen / NRK

– Munnje lei njuolgut heahpadin go sámedigge­presideanta ii lean dárkkistan doahpagiid mat gullet mearrasámi eallimii go hállá mearrasápmelaččaid birra ođđajagesártnistis almmolaš sáddagis, lohká Åge Persen Ávvirii.

Sámediggepresideantta Aili Keskitalo ođđajagesártnis lei eiseválddiid 150 jagi dáruiduhttin fáddán ja son namuhii dan oktavuođas riddoguovlluid gosa dát lei čuohcan garrasit, go ollugat leat dan dihtii hilgon dahje massán sámegielaset.

– Jus fanas ii jeage čázi, de ferte fanas leat áimmus. Mii mearrasápmelaččat lohkat fanas ii leat divttis. Eatge mii loga čáhci suođđá. Áibmu dat suođđá. Šattai áibbas endorii, erenoamážit go lea mearrasápmelaččaid birra hállamin, cuiggoda Persen.

– Gákkaha váimmu

Bargiidbellodaga sámediggeáirras, Vibeke Larsen, bealistis ohcalii višuvnnaid Keskitalo sártnis.

Vibeke Larsen

Vibeke Larsen (Bb).

Foto: Pressebilde Ap

Son oaivvilda presideanta ii nagodan čuovvolit dan buori ođđajagisártni maid diibmá doalai, ja váillaha čielga áigumušaid dán jagi sártnis.

– Njulgestaga gákkaha váimmu, cealká Larsen.

Dán son čilge ná:

– Norgga historjái geahččalit čállit sápmelaččaid, muhto de leamaš ovdamearkka dihtii váttisvuođat darvvihit Álttá mearrasámiid sámi historjái, ja doppe dat berrešii álgit, go muđui šaddet dušše fiinna sánit, cuiggoda Vibeke Larsen.

Dasa vástidii Aili Keskitalo, ahte son sávašii ahte Larsen deavvasmuvašii.

– Son berrešii nuppes gullat mu sártni vai gulašii maid mun duođaid dadjen, vástida Keskitalo.

Aili Keskitalo holder nyttårstalen 2015.

Dás sáhtát geahččat olles Aili Keskitalo ođđajagisártni.