– Šállošahtti! Dát čuohcá allaoahppan lágádusbargiide sihke Kárášjogas ja Deanus, lohká lágádusa stivrajođiheaddji Harald Gaski.
ČálliidLágádusas leat dál logi bargi ja sin váldobargun lea buvttadit oahpponeavvuid, fáktagirjjiid ja čáppagirjjálašvuođa.
Lágádus lei ohcan 10 miljon ruvnnu buvttadit digitála oahpponeavvuid ja dán ohcamuša hilggui Sámediggi
– Hui šállošahtti go Sámediggi ii vuorut ođđaáigásaš oahpponeavvuid ja seammás addá ruhtadoarjagiid dáža lágádusii, cuiggoda stivrajođiheaddji Gaski.
Sámediggeráđđelahttu Silje Karine Muotka lohká sámediggeráđi dál bargamin dainna, ahte gávdnat čovdosa dán dillái.
– ČálliidLágádusa doarjjaohcamuš gullá dan nu ohčoduvvon Salaby prošeaktii, mas oppalaš bušeahtta lea 20-30 miljon ruvnnu. Sámediggi lea dál eiseváldiiguin ságastallamin vai juolludivčče dán ruđa, čilge Muotka.