Háliida sirdit čuoigamiid davás

Bjørn Roald Mikkelsen háliida sirdit máŋga stuorra riikkaidgaskasaš čuoigamiid davás dálkkádatrievdamiid geažil. Son lei gilvojođiheaddji norggameašttirgilvvus čuoiganbáhčimis mii lágiduvvui Álttás mannan vahkkoloahpas.

Seammás go lea fápmoheahti Eurohpás, de geavahit olu fámu ráhkadit goanstta muohttaga čuoigganláhtuide.

Mikkelsen háliida baicce lágidit čuoigamiid doppe gos lea muohta.

– De livčče lunddolaš ahte čuoiganáigodat álggášii easkka ođđajagimánus dahje guovvamánus, dalle lea buoret muohtadilli Eurohpás. Njukčamánus, ja eandalii cuoŋománus lea fas Davvikalohtas hirbmat buorre čuoigansiivu, dadjá Mikkelsen.

Finnmárku gievru dan botta go Ruošša návccahuvvá

Ođđa Jegerkompaniija Mátta-Várjjagis lea fargga ollislaččat operatiiva, ja dasa lassin geavahit miljovnnaid hukset Porsáŋggu garnisovnna.

Nu muitala Finnmárkku eanasuodjalusa hoavda Jørn Qviller Sør-Varanger áviisii.

Seammás leat Ruošša beale soahteveagat návccahuvvan, čállá áviisa.

– Ruošša bealde lea Guoládaga guokte brigáda sáddejuvvon Ukrainai ja leat massán olu. Ossodagat mat leat báhcán Guoládahkii galget suodjalit doarjjabáikkiid mat leat doppe, nugo mearrasuodjalus doarjjabáikki ja girdidoarjjabáikkiid, dadjá Qviller.

Dasa lassin lea FSB:a rádjaveagat seamma go ovdal.

– Muhto ruošša veagat leat eahpitkeahttá návccahuvvan, dadjá Qviller.

Riddogielddat vuorjašuvvet ođđa luossavearus

Riddogielddat ballet gielddatienas ja ealáhusinvesteremat unnot go guollebiebmanealáhusa vuođđoreantovearru fargga doaibmagoahtá.

Vaikke ráđđehus lohpida tietnasiid lassánit ja bissut stáđisin, de gielddat eai riekta jáhke dasa.

Vuotna ja riddogielddaid fierpmádaga stivrraáirasa, Monica Nielsena, mielas lea diehttalas ahte dat gielddat gos lea guollebiebmandoaibma fidnejit dan ruđa mii boahtá dien ealáhusas.