Preassadeiđáhusasteaset hásttuhit eamiálbmotfestivála lágideaddjit olbmuid dieđihit daid olu kurssaide maid fállet daidda geat leat Olmmáivákkis suoidnemánu logát gitta 15. beaivái.
Okta riemuid bivnnumus kurssain lea dálkkasaddokursa Lien ekologalaš gárdimis. Tom Liena máhttu šaddadit ja geavahit davvinorgga dálkkasšattuid orro geasuheamen.
Eará kursafálaldat dán jagi lea giellavázzin, gos olbmot besset oahppat sámegiel luonddusániid ja báikenamaid váccedettiin. Ja sihke mánáide ja nuoraide fállojit maid riidenmátkit ivgoheasttaiguin.
Oppalaš kursafálaldagas lea maid festiválasámegiella, gođđin komimálle mielde, juoigan, riidenskuvllaš mánáide ja Indigenous Youth Camp - mas lea sierranaš kursafálaldagat nuoraide.
