NRK Meny
Normal

Kultuvrav æládussan ájggu

Gæhttjalit dal galggi kultuvrav æládussan åvddånahttet, ja nav viehkken sidjij gejna l hállo ietjasa vidnudagáv ásadahttját. Duodje ja mannoæládus la guokta doajmmatjerdajs.

Lars Magne Andreassen rahpá dal uvsav duodjeåssudahkaj Árranin, ja sávvá buorisboahtem prosjæktaj oa

Lars Magne Andreassen rahpá dal uvsav duodjeåssudahkaj Árranin, ja sávvá buorisboahtem prosjektajda oassálastátjit.

Foto: Sander Andersen / NRK

Kultuvrra dal æládussan galggá sjaddat. Julevsáme guovdásj Árran Divtasvuonan jådet prosjevtav mij gålmmå jage vihpá. Mannoæládus ja duodje la guovddelin, subtsas Árrana direktørra Lars Magne Andreassen.

– Prosjevta lij, majt dåhkki gåhttjot, kultuvrraæládusprosjevta; kultuvrraárbev æládussan dahkat. Dåhkki gus viessot, jali le gus vejulasj sáme kultuvrav vuodon adnet dagu dal juojddá buvtadit, dagu dal duojev, jali dåhkki aj mannoæládusvidnudagáv ásadit, ja dievnastusájt ja dáhpádusájt dan hárráj vuobddet ja dassta viessot?

Gålmmå jage

Sámedigge ja Nordlanda fylkasuohkan doarjju Árranav dáj prosjevtaj, ja Árran aktisattjat barggá Divtasvuona ASVO:jn ja duodjesebrudagájn Duodje Nordlánnda, ja la juo guoktásav virgijda biedjam mij guosská duodjeåvdedibmáj. Árrana direktørra la riek dudálasj ja mielos.

– Dá li gålmå jahkásasj prosjevta gånnå guokta oase vieledip: Birrusijt ásadit gånnå ASVO:n ja Árranin giehtos duodjeiehkeda ásadalladuvvi, ja duodden lip aj guokta duodjebagádalle virgijda biedjam.

Guokta duodjebagádalle libá juo virgen Árranin. Akta sunnus la Mathias Harr.

Guokta duodjebagádalle libá juo virgen Árranin. Akta sunnus la Mathias Harr.

Foto: Sander Andersen / NRK

Guokta oase

Prosjækta l juogedum guovte oassáj. Nubbe oasse la æládusáv tjalmostit ja viehkken liehket vidnudagáv ásadittjat, giehttu Lars Andreassen.

– Goappátjij prosjevtan doajvvop ulmutja li gudi sierraláhkáj berusti dájt suorgijt, ja gudi aj gåtsedi ja åhpadi fágav dan diehti gå ulmme l vidnudagáv álgadit juogu dal duodjesuorgen jali mannoæládussuorgen. Ulmme l má ietjama kultuvrraárbes viessot.

Avtat rajes

Árran la åvddåla duodjáj vieledam, valla dálátjij ij la vaddám ietján gå dajt jagijt gå prosjækta vibáj. Lars Andreassen jáhkká dájna dal galggi vuorbástuvvat.

– Doajvvop dajna vuorbástuvvap gå ulmev biedjap. E desik muhtema sijájs galggi ietjasa vidnudagáv ásadit prosjevta gávdan mij la gålmmå jage. Åvddåla lip rudájt oadtjum jagev ájgen. Ja nav de ij lim avtat rajes. Dálla lip rudájt oadtjum gålmmå jage, ja gå de lip gålmmå jage barggam jáhkáv båhtusa li iehtjáda gå åvddåla. Dálven gåhttjop ulmutjijt diehtotjåhkanibmáj, ja nav de åhtsåp ulmutjijt gudi dáj sihtá barggat.