Hopp til innhold

Marianne mánát eai beasa deaivvadit

Koronaeastadanbijuid geažil lea eahpečielggas, besset go Marianne mánát deaivvadit go orrot goabbat bealde rájá.

Marianne Blind med familie

BEARAŠ: Váhnen guovttos beassaba rasttildit rájá, muhto sudno mánát eai beasa.

Foto: Privat

Marianne Blind orru ja bargá Norgga bealde ja su guoibmi guhte lea boazosápmelaš orru ges Ruoŧa bealde. Marianne luhtte orrot nuoramus mánát ja áhčis luhtte ges boarráseamos nieida. Rádjebargin gal beassaba ieža rasttildit rájá, muhto mánát eai.

– Eai gávdno makkárge njuolggadusat, mat orrot guoskamin njuolga mánáide, ii gostege čuoččo makkár njuolggadusaid vuollái dat šaddet, lohká Blind.

Guoibmi ii sáhte fárret Norgga beallai ealáhusa dihte ja boarráseamos nieida ges vázzá sámeskuvlla Sohpparis, Ruoŧa bealde.

– Ja ággan manin son vázzá doppe skuvlla lea giela dihte, lohká Blind.

Ráđđehusa spiehkastagaid mielde livččii Mariannes vejolašvuohta johtit mánáin rájá rastá, jus son ja guoibmi eaba livčče ovttas párran.

Nu ahte Marianne ja su guoimmis livččii vejolašvuohta dadjat ahte eaba leat ovttas, muhto su mielas ii oro riekta gielistit.

Sáddii reivve stáhtaministara kantuvrii

Blind dolkkai go dát ráddjehusat hehttejit sin árgabeaivválaš johtima Omasvuona ja Sohppara gaskka, ja sáddii reivve stáhtaministara kantuvrii, ja maid Norgga, Ruoŧa ja Suoma sámedikkiide.

Marianne ii leat vel ožžon vástádusa stáhtaminstara kantuvrras.

– In lean gal vuordán oažžut vástádusa, muhto mun sávan ahte soitet dán birra jurddašit boahtte háve go fas rievdadit njuolggadusaid, lohká Blind.

Blind lea gierddohuvvan go su mielas orru ráđđehus vajálduhttán sin, go mearridit ođđa njuolggadusaid.

– Vuoigatmeahttun dilálašvuohta

Sámediggeáirras ja NSR jođiheaddji Runar Myrnes Balto lea mielde lávdegottis, mii bargá dákkár rádjáhástalusaiguin.

Runar Myrnes Balto leder for NSR

GULAHALLAN: Sámedikkis lea politihkalaš oktavuohta justiisaministariin dákkár áššiid hárrái.

Foto: Pressebilde / NSR

Son lohká ahte lea buorre go Marianne Blind lea sádden reivve sámedikkiide.

– Marianne ja su bearaš lea gártan áibbas vuoigatmeahttun dillái, lohká Myrnes Balto.

Myrnes lohká dán ášši nu konkrehta ahte sii sáhttet ja áigut, geahččalit dál gávdnat muhtun vuogi spiehkastit dáin njealječiegat njuolggadusain.

Myrnes deattuha ahte lea ráđđehus mii ferte dáidda gažaldagaide vástidit, muhto lohká iežaset Sámedikki jođihangottis ja NSR bealis bargat dan maid sii sáhttet vai Blind sáhttá johtit olles bearrašiin rájá rastá nu fargga go vejolaš.

Dearvvašvuođa- ja bearráigeahččodepartemeanttas áddejit bearraša váttes dili, muhto dadjet ahte buohkat fertejit čuovvut errennjuolggadusaid.

– Mii fertet ain sihke dárkkistit ja gáibidit koronaiskosa ja errema eastadit virusa leavvamis. Ja dieđusge diehtit makkár hástalusaid dat dagaha sihke boazoealáhussii ja olbmuide, geat rasttildit rájá ja sávvat ahte dát dilli ii bisttášii nu guhká, dadjá Dearvvašvuođa- ja bearráigeahččodepartemeantta stáhtačálli Maria Jahrmann Bjerke.

Korte nyheter