Korte nyheter

  • Arnar givssidanášši joatkašuvvá

    Kárášjoga ovdagotti eanetlohku lea gaskavahkku árvalan doalahit guoddalanmearrádusa Arnar Vuolab Jørgensen givssidanáššis. Kárášjoga sátnejođiheaddji Svein Atle Somby muitala iežaset leat čuvvon gieldda advokáhta rávvaga. Kárášjoga gielddastivrra gieđahallá ášši juovlamánu 16. beaivve.

    Sis- ja Nuorta-Finnmárkku diggegoddi dubmii geassemánus 2021 Kárášjoga gieldda máksit miljovnna ruvnnu Arnar Vuolab Jørgensii go givssiduvvui Kárášjoga skuvllas.

    Ansiktsbilde av Arnar Vuolab Jørgensen fra Brennpunkt
    Foto: NRK Brennpunkt
  • Rájáhis sámeoahpahus konferánsa

    Sámeoahpahusa ovttasbarggu nannemis ságastallet dál guokte beaivvi Anáris. Rájáhis sámeoahpahus – davviriikkalaš forum álggii otne gaskavahkku ja joatkašuvvá vel duorastaga. Maid davviriikkaid oahpahusministarat čalmmustahttet dán foruma.

    - Sámi allaskuvlii lea erenoamáš dehálaš čuovvut dákkár ságastallanforumiid, dadjá rektor Laila Susanne Vars.

    Veaigesáddagis 16.00 olu ságat dán konferánssas

  • Omikron-njoammumat Norggas

    Norggas lea duođaštuvvon nuppástuvvan koronavirus omikron-njoammumat. Øygarden gielddas lea guokte njoammuma duođaštuvvon. Dát guovttis leaba Norgii boahtán Mátta-Afrihkas skábmamánu 20. beaivve. Maiddái Oslos lea guokte omikron-njoammuma ja soai leaba maid Norgii boahtán Mátta-Afrihkas. Guktot leaba karantenahotellas. Ovttasge dáid olbmuin eai leat garra dávdamearkkat.