NRK Meny
Normal

Keskitalo lea mielde go sámi filmmat čájehuvvojit Torontos

Sámediggepresideanta Aili Keskitalo oasálasttá riikkaidgáskasaš filbmafestiválas The «imagineNATIVE Film + Media Arts Festival» Torontos Kanádas dán mánu 14. - 18.beaivái.

Sametingspresident Aili Keskitalo på Stortinget

Sámediggepresideanta Aili Keskitalo navdá sámi filbmabuvttadeamis čuvges boahtteáiggi.

Foto: Kjell Are Guttorm/NRK

– Munnje lea erenoamáš somá oaidnit, ahte sámi filbmabiras lea mielde hábmemin sisdoalu dákkár deaŧalaš filbmafestiválii eamiálbmotfilmmaide. Festivála lea áidnalunddot vejolašvuohta sápmelaččaide ovdanbuktit sámi filmmaid riikkaidgaskasaččat. Danne lea Sámedikki mielas deaŧalaš doarjut sámi filmma, mii leat earret eará oasseruhtadan «7 Sámi stories»-filmmaid, lohká Aili Keskitalo.

«The imagineNATIVE Film + Media Arts Festival» lea eamiálbmot media- ja dáiddafestivála, mii lágiduvvo juohke jagi Torontos Kanádas.

Sámi filmmat čájehuvvojit festiválas namahusain: «International spotlight on The Sapmi nation». Dáid beivviid lágiduvvo maiddái lávdedigaštallan sámi filmma birra.

– Dás čađaha Sámi riikkaidgaskasaš filbmainstituhtta buori barggu mii bidjá vuođu sámi filbmaindustriijii mii lea stuorrumin. Jáhkán mii fargga beassat oaidnit sámi spillenfilmmaid maid nuorra sámi filbmadahkkit leat ráhkadan, sávvá sámediggepresideanta Aili Keskitalo.

Sámediggi lea juolludan 150.000 ruvnnu sámi oassálastimii festivála oktavuođas.