NRK Meny
Normal

Keskitalo gearggus joatkit

Sámedikki presideanta Aili Keskitalo lea dieđihan iežas organisašuvdnii, NSR:ii, ahte son vuolgá 2017 sámedikkiválggaid presideantaevttohassan jus organisašuvdna dan dáhttu.

Sametingspresident Aili Keskitalo

Áili keskitalo lea gearggus vuolgit NSR presideantaevttohassan ja maiddái Sámedikki presideantan jus iežas organisašuvdna ja sámi álbmot su dohkkeha.

Foto: NRK

Norgga Sámiid Riikkasearvvi (NSR) riikkastivra lea juo árvalan organisašuvnna riikkačoahkkimii Aili keskitalo searvvi presideantaevttohassan maiddái 2017 válggaide.

Duostil ja njuovžil

NSRa jođiheaddji, Beaska Niillas, govve Keskitalo guldaleaddji ja jálos sámiid jođiheaddjin, ja dadjá Keskitalos ollu dieđuid ja máhtu Sámi álbmoga hástalusain ja vejolašvuođain ovddosguvlui.

–Aili jođiha Sámedikki njuovžilit ja son duostá vuostildit go sámi vuoigatvuođat uhkiduvvojit. Orro vel nu ahte dás ovddosguvlui de fertet mii ain nannoseabbot dáistalit ja várjalit sámi kultuvrra vuođu ja dalle mii dárbbašat jođiheaddji guhte ii bala suoivvaniiguin. De mun lean hui ilus go Aili dáhttu joatkit bargat sámi álbmoga ovddas, dadjá Beaska Niillas.

Gearggus joatkit bargguin

–Mus lea ain nana dáhttu ja mu mielas lea gudni beassat joatkit dainna bargguin mii lea mu váimmu lagamus. Mu movttidahttá jurddašit ahte sámi giella ja kultuvra ja min eallinvuogit galget ain eallit ja boahtit ávkiin min maŋisbohttiide, dasdjá Aili keskitalo.

Aili Keskitalo
Foto: Johan Mathis Gaup

Dán movtta sávan joatkit vai politihkálaččat beasan geavahit dáid jagiid ovddosguvlui, go sámi álbmot čoahkkana várjalit buot dan mii midjiide lea divrras, dadjá Keskitalo.

NSRa presideantaevttohas válljejuvvo organisašuvnna riikačoahkkimis Álttás golggotmánu 7-9. beivviid.