Viehttalanfitnodagain einnostit Keiino vuoitit MGP

Les saken på norsk.

Guokte jagi áigi ožžo sii eanemus gehččiidjienaid Eurovison finálas Israelas. Lávvordaga galget fas gilvalit beassat ovddastit Norgga máilmmi stuorámus musihkkagilvvus Rotterdamas miessemánus.

– Mii leat hui ilus, veaháš jierásmuvvan ja veaháš speanttat, muhto mii illudit dan stuorra festii mii lea lávvordaga, lohká Fred Buljo mojunjálmmiid.

Buljo, ovttas Aleksandra Rotaniin ja Tom Hugo Hermanseniin gilvaledje guovtti jagi áigi, 2019s, Melodi Grand Prixas ja vuite lávlagiin «Spirit in the sky».

Dán jagi sii gilvalit šuoŋain «Monument», mii válljejuvvui ovttas viđain eará lávlagiin njuolgga loahppagilvvuide.

– Monument čájeha ahte mii leat guokte jagi bargan ovttas, mii dovddadat ollu buorebut ja mun jáhkán dat boahtá ovdan maid dan lávlagis.

Vehtton bajimussii

Olbmot leat veahtán gii dán jagi vuoitá, ja Keiino lea bajimusas dán listtus. 46 proseantta leat árvvoštallan ahte dat dat vuitet. Nuppi sajis lea TIX dušše 18 proseanttain.

Muhto Buljo ii loga iežas diđoštit dáid listtuid.

– Mii eat guovlla nu ollu daidda oddsaide. Mun in jáhke dat čájehit dan duohta gova, muhto dieđusge dat lea somá ahte olbmuin lea stuorra jáhkku, dadjá son ja joatká:

– Mun in jáhke dan leat nu stuorra ovdamunnin midjiide, oainnat olbmot fertejit goitge muitit jienastit.

Dasa lea Fred Buljo eadni, Linda Johansen, áibbas ovttaoaivilis.

– Sii dieđusge vuitet, dat lea min vuordámuš. Sii han leat favorihtat, mii maid sáhttá veahá issoras go de olbmot vajálduhttet ahte sii fertejit jienastit sin, lohká Johansen.

• Loga maid: Gudnejahttá Keiino tatoveremiin: – Sii movttiidahtte mu doarrut dávdda vuostá

Ávvudit ruovttus

Melodi Grand Prix lea dán jagi čovdon veahá eará ládje, go eai sáhte leat geahččit.

Mannan háve go Keiino lei mielde loahppagilvvus, de lei olles joavku Guovdageainnus mannan Osloi sálii geahččat go sii ledje lávddis.

Dán lávvordaga čoahkkana oassi Buljo-bearrašis geahččat MGP loahppagilvvu.

– De mii áigut ráhkadit buori biepmu, ávvudit ja jienastit tv ovddabealde, veahá bulljarasčáziin, čilge eadni Johansen.

– Lea gal veahá ártet. Fred han diehtá ahte mii ávvudit su ja jurddašit su birra, muhto livččii gal leat erenoamábut leat doppe gos dáhpáhuvvá. Mun boađán aŋkke veahá čierostit, go álkit njuorasmuvan, dadjá Johansen.

Ja jus Keiino vuitet, de lea sus čielga plána.

– Jus sii vuitet de sii besset Nederlándii. Ja jus dalle lea nu ahte lea vejolaš vuolgit geahččat, de gal lean mun manname dohko, deattuha Johansen.

Illudit

Lávvordaga lea ge dat stuorra beaivi, ja Buljo mieđiha ahte sin mielas lea váttis diehtit movt dat manná.

– Dán jagi leat hui ollu iešguđetlágan artisttat, ja čeahpes artisttat.

– Buohkat geat dál leat mielde, dain leat iešguđetlágan šáŋŋerat, nu ahte dat lea hui váttis dadjat de gii lea sin gilvaleaddji.

Sii illudit lávvordahkii, ja jus dat galggašii mannat nu ahte sii vuitet, de Buljo boahtá lohpádusain:

– Jus mii Keiinos oažžut vejolašvuođa fas ovddastit Norgga ja Sámi Eurovisionis, de mii áigut addit visot mii mis lea ja geahččalit oažžut Eurovision 2022 Norgii.

• Loga maid: Her er MGP-favorittene: – Vi skal kjempe til siste sekund