NRK Meny
Normal

Katja Gauriloff vuittii filbmariemuid váldovuoittu

Katja Gauriloff vuittii dán jagi Northern Character filbma ja tv riemuid váldovuoittu.

Katja Gauriloff

Katja Gauriloff lea bures lihkostuvvan filmmainis «Kuun metsän Kaisa».

Foto: Vesa Toppari / Yle Sápmi

Filbma lea davvisámegillii gohčoduvvon «Mánu meahci Kaisa» eaŋgalasgillii «Kaisa’s Enchanted Forest» ja suomagillii «Kuun metsän Kaisa».

Mánu meahci Kaisa dahje Kuun metsän Kaisa

«Mánu meahci Kaisa» váldui bures vuostá Northern Character filbmariemuin.

Foto: Preassagovva

Mannan vahkkoloahpa lágiduvvojedje Northern Character filbma ja tv riemut Murmánskkas. Dás vuittii filbma «Grand Prix of The Festival».

Filbmii lea Katja Gauriloff čállán giehtačállosa. Buvttadeaddjit leaba Enrique Mendéz ja Heikki Ferm. Jietnabargu: Timo Peltola, Jukka Nurmela. Animašuvna: Veronika Bessedina.

Muđuid šattai Gørild Mauseth ja su isidaTommaso Mottola filbma «Karenina and I» filbmariemuid stuorra vuoiti. Mottola vuittii buoremus bagadeami ovddas. Mottola, Andreas Ausland ja Gleb Teleshev vuite bálkkašumi buoremus govvema ovddas.

Ellá Márge IeŽár

«Ellá Márge IeŽár» lea okta dain mii vuittii bálkkašumi dán vahkkoloahpa.

Foto: Preassagovva / NRK

NRK Sámi mánáid-tv filbma «Ellá Márge IeŽár» vuittii bálkkašumi Buoremus mánáid- ja nuoraidprográmma.

Lágiduvvui logát geardde

52 filmma miehtá máilmmi oassálaste dán jagi riemuin. Filmmaid váldofáddán leat davviguovllut.

Filmmat gilvalit čieža iešguđetge bálkkašupmesuorggis: dokumentára, dokumentára debuta, oanehisfilbma, tv-prográmma, portreahtta, kulturprográmma ja mánáid-/nuoraidprográmma.

Gørild Mauseth

Dovddus norgalaš filbmanásti, Gørild Mauseth, lei Murmánskkas dán vahkkoloahpa. Sus lea váldorolla «Karenina and I»-filmmas.

Foto: Pressebilde / Northern Character

Bálkkašumit juhkkojuvvojedje lávvardaga.

Northern Character International Film & TV Festival lágiduvvui logát geardde. Vuosttaš riemut lágiduvvojedje jagis 2008.