NRK Meny
Normal

Kárášjogas ja Divttasvuonas lassánan ássit

Statihkalaš guovddášdoaimmahaga logut čájehit ahte vuosttaš kvartálas dán jagi leat dušše Kárášjogas ja Divttasvuonas lassánan ássit.

Karasjok og Tysfjord 2014
Foto: Simon Piera Paulsen/Elvi Rosita Norvang / NRK

Tor Asgeir Johansen

Divttasvuona sátnejođiheaddji Tor Asgeir Johansen.

Foto: Sander Andersen / NRK

Eará gielddain lea olmmošlohkku njiedjan.

– Garrasit bargan vai lihkostuvvet

Divttasvuona sátnejođiheaddji Tor Asgeir Johansen dadjá ahte sii leat garrasit bargan vai lihkostuvvet, ja dadjá ahte sii leat huksen ođđa ásodagaid, divodan skuvllaid ja láhčán doarvái mánáidgárdesajiid.

Son oaivvilda ahte dá leat doaimmat mat dagahit ahte suohkanat lihkostuvvet.

Statihkalaš guovddášdoaimmahaga logut čájehit ahte Divttasvuonas lea olmmošlohku lassánan 12 olbmuin vuosttaš kvartála dán jagi, vaikko vel leat ge 19 olbmo fárren.

Kárášjogas ges lea lassánan 13 olbmuin, vaikko vel 23 olbmo leat fárren.

Eará suohkaniin olmmošlohku njiedjan

Eará suohkaniin lea olmmošlohku njiedjan.

Doppe gos olmmošlohku lea eanemusat njiedjan lea Guovdageainnus, gos vuosttaš kvartálas fárrejedje 16 olbmo, ja Loabágis ges fárreje ovcci olbmo.

– Berrejit láhččit buori dili ealáhusdoaimmaide

Johansen oaivvilda ahte suohkanat berrejit láhččit buori dili ealáhusdoaimmaide, vai sáhttet fállat geasuheaddji virggiid olbmuide, go de olbmot háliidit bisánit suohkaniidda.