Kamilla Evensen Borkenesas, Hársttán vuojnná ietjasav låjes tjiektjamduobmárin, ja ij lijkku várrodusájt juohket. Valla akti de hæhttuj hárjjidalláj ruoppsis kårtåv vaddet.
– Tjiektjama gassko de hárjjidalle tjiektjamsalljuj bådij. Tjuorvoj ja stuojmev dagáj. Muv huorrán gåhtjudij.
Hådjån gå vuojnná máná dakkir dilev vásedij
Kamilla ij sidá ilmodit gånnå dát dáhpáduváj, valla lij gåjt tjiektjam-gilpos mij lij mánájda hiebadam. Hådjån gå ållessjattuga e mánáj siegen nagá ulmutjahttet.
– Iv dádjada gåktu ållesjattuk mánáj birrusijn navti dahka. Duobmárin de lav duov dáv vásedam, valla dáv dáhpádusáv sjattav mælggadav mujttet.
Moattes e duobmára mærrádusájt berusta. Sávvá gájka galggi åvdåsvásstádusáv dåbddåt, ja buorre åvddågåvvån mánájda liehket.
– Muv mielas de hárjjidalle ja ållessjattuga e dan lahkaj galga skadjalit. Sierraláhkáj gå máná lij guovdátjin. E sij vastes moallánagájt ja garov dárbaha gullat.
- Lågå aj:
Gå ulmutja vuojtádalli, sierraláhkáj dalloj, de nievres tsuojggidusá badjáni.
– Åvddåla de dakkir moalgedime nievret lahkaj muv bájnnijin. Valla dálla de lav dasi nav hárjjánam. Nav álu dáhpáduvvá. Ássjij badjel låptijdav.
Rudá lij sivvan manen álgij
Kamilla l duobmárin vitta jage barggam.
– Tjiektjamin lidjiv. De soames ålmmå bådij ja jæskoj jus sihtiv gæhttjalit duobmárin barggat. Dasi de diedediv.
Ållu vuostatjin de lidjin rudá ájnnasamos sivva manen duobmárin barggat sidáj.
– Bálkká muv virggáj giesij. Nágin tjuode tjijnnijiv, ja de diedon manojt máksin. Valla dálla iv desti rudáj diehti dav dagá. Dagu asstoájggedoajmma l sjaddam.
Sihtá oahppat – Tjiektjamijt TV'an gæhttjá
Dijmmá giese de Kamilla Norway Cupav duobbmidaláj. Tjiektjam gånnå oassálastij TV'an sáddiduváj.
– Dálátjij le dat stuorámus dahpadus muv duobmár-virgen. Stuor tjiektjamgilpos le. Oattjov ulmutjijt ietjá rijkajs iejvvit.
Gå TV'an tjiektjamijt gæhttjá, duola dagu EM-gilppusin, de ienemusát duobmárijda gæhttjá.
(Ártihkal gåvå maŋŋel joarkká)
– Iv vuojga tjiektjida gehtja. Sidáv smidáp duobmár sjaddat, danen de la navti.
Niehko l divisjåvnåjt bajás bessat.
– Sidáv vuostasjdivisjåvnnåj jåvsådit. Åvdås gå dåk jåvsådav, de hættuv teorijav låhkat ja ienep tjiektjamijt duobbmidallat. Ja de hæhttuv lásjumdallat vaj nagáv viehkat.
– Máhtá gus gájka njuolgadusájt?
– Doajvov dav. Gåjt stuor oasev, tjajmmá lågenangietjavjagák.
- Lågå aj ietjá tjállagijt julevsábmáj: