NRK Meny
Normal

Kalle Urheim boahta Márkomeannui

Márkomeannu festivala rámis go Kalle Urheim oasálasta festiválas.

Kalle Urheim

Kalle Urheim lávlu sámi álbmotbeaivvedoaluid oktavuođas Tråantes dán jagi.

Foto: NRK

– Eai leat nu galle ođđa musihkkára geat leat olahan nu ollu fuomášumi go Kalle Urheim, oaivvilda Márkomeannu festiválabuvttadeaddji Susanne Amalie Langstrand-Andersen.

Divttasvuona artista lea ožžon rámi sihke dáža ja sámi mediain, ja guldaleddjiin maid, maŋŋágo su vuosttašskearru «Ruodjo /Sacred breath from the Tundra» almmuhuvvui.

Gelddolaš artista

Márkomennui son boahtá roastilat go goas ge ovdal, ja áibbas varas lávlagiiguin.

– Min mielas lea Urheim hui gelddolaš artista. Vuohki mo son nagoda seaguhit rocka, jazza, sámi sálbmaárbevieruid ja luođi, dagaha su artistan man gánnáha vásihit, dadjá festiválabuvttadeaddji Susanne Amalie Langstrand-Andersen.

Kalle Urheim

Karl Urheim konsearta Davvi-Norgga álbmotallaskuvllas mannan čavčča.

Foto: Mathis Eira / NRK

Kalle Urheim, Divttasvuonas Nordlanddas eret, lea poehta, komponista, lávllačálli ja lávlu. Son lea studeren Musikkonservatorietas Romssas. Son komponere musihka julevsámegillii, dárugillii ja eaŋgalasgillii man vuođus lea julevsámi juoigan- ja lávlunárbevierru.

Oasálastán Sámi Grand Prixas

Son lei mielde Sámi Grand Prixas 2015:s ja šattai álbmoga jiellahin šuoŋain «Idjasuojvvan / Nattskyggen». 2016:s almmuhii son vuosttašskearru, «Ruodjo», ja Avisa Nordland attii sutnje 6 birccuin vuosttašovdanbuktima ovddas.

Márkomeannu lea sámi musihkka- ja kulturfestivála mii lágiduvvo Evenášši ja Skániid suohkanrájis suoidnemánu loahpas juohke jagi.