Kaia lea hárjehallan USA:s - dál mihtida fámuidis Norgga buoremusaiguin

Odne iđđedis álge norggameašttirgilvvut vuodjamis Drammenis lulli-Norggas.

– Šaddá hui somá oaidnit makkár dássi NM:s lea ja buohtastahttit fámuid, dadjá Kaia Norbye.

Nuorra kárášjogatvuoddji vázzá skuvlla Alaskas Amerihkás, go fálle sutnje earenoamáš stipeandda. Doppe son hárjehallá sullii 23 mehter guhkkosaš vuojadanáldásis.

– Amerihkás mihtidit guhkkodaga yards-mihtuin ja doppe lea áldása guhkkodat 23 mehter rihkku juoidá, čilge Kaia.

Hárjeheaddji rámida Kaia

Áltálaš Tom Erik Olsen lea guhtta jagi leamaš Kaia Norbye hárjeheaddji go son orui Álttás.

– Dan maid son dáppe čájehii dat lei vuođđun dasa go oaččui stipeandda ja beasai Alaskas studeret ja hárjehallat, čilge Olsen.

Hárjeheaddji rámida iežas ovddeš oahppi.

– Sus lea hirpmus čehppodat. Son lea jođán álggus, jorggihemiin ja johtilat olaha alla leavttu. Diet lea eahpitkeahttá su stuorámus ovdu, muitala Olsen.

Hárjeheaddji čilge, ahte dat mainna Norbye eanemus lea rahčan lea sávrivuohta.

– Dáinna letne olu bargan ja danne lea son maid sakka ahtanuššan oanehis gaskkain. In dieđe man bures son lea ráhkkanan NM:i, muhto su gilvoáigodat USA:s nogai jo cuoŋománus. Danne lea váttis dadjat mo son dál sáhttá birget, dovddaha Olsen.

Norggameašttirgilvvuin Norbye oassálastá beali guhkit áldásis Alaska ektui, go son oassálastá dáin surggiin ja gaskkain:

• 50 m friddjavuodjamis
• 50 m raddevuodjamis
• 50 m butterflyvuodjamis
• 100 m friddjavuodjamis
• 100 m raddevuodjamis ja
• 400 m medley sáttatvuodjamis (Norbye vuodjá 100 m raddevuodjama)

Espánjas ráhkkanii NM:i

Kaia Norbye finai guokte vahku Calellas lahka Barcelona, gos son ráhkkanii NM-gilvvuide. Doppe lea 50 mehter guhkkosaš vuojadanálddis.

– Dat lei oppa guhkes vuojadanálddis, dadjá Nordby ja boagusta.

Son liiko buoremusat vuodjat oanehis gaskkaid.

– Danne liikonge hui bures Alaskas vuodjat oanehis áldásis, dadjá son movttegit.

Vaikko son ii muitte bajiloaivvi iežas persovnnalaš buoremus áiggiid oanehis gaskkain, de son muitá sullii man bures lea vuodjan:

• 50 m raddevuodjamis 35 sekundda
• 50 m butterflyvuodjamis 28 sek.
• 50 m friddjavuodjamis 27 sek.

Norbye ovddasta dál Álttá vuodjansearvvi, muhto lea maid ovdal ovddastan Kárášjoga vuodjansearvvi.

– Munnje lei álkit vuodjat Áltá ovddas, go mun orron Álttás ovdalgo fárrejin Alaskai. Seammás vuojan ovttas Álttá vuddjiiguin sáttavuodjamis, muitala Norbye.

Dán joavkkus vuodjá nubbi kárášjohkalaš, namalassii Siri Sipilä Næss.

Sávvá medálja vuoitit

Kaia Norbyes eai leat nu nanu vuordámušat golli fiškalit.

– In jáhke, muhto aistton gii bat dan diehtá, dadjá son movttegit ovdal go vástida duođaleappot.

– Mun in jáhke norggameašttirin gal šaddat, muhto jus vuojan bures, johtilit ja jus nagodan bidjat ođđa persovnnalaš olahusaid, dalle gal sáhttá vaikko mii dáhpáhuvvat, dadjá son.

Boahtteáigge mihttu

Kaia Norbye sávvá diehttelasat buriid bohtosiid NM-gilvvuin, muhto sus lea maid mihttu beassat oassálastit «Nationals» nammasaš riikkaviidosašgilvvuin USA:s. Gilvvuid sáhttá buohtastahttit NM:in, muhto dat leat dušše mealgat stuorát.

Dán jagi son lei dušše logádas sekundda duohken gealbudahttit gilvvuide.

– Mus leat plánat ruvddiiguin hárjehallat vai gievrrun go ollen fas Alaskai, go dat lea ovdamunni leahkit snáhpis go vuodjá oanehis gaskka, čilge son.