– Dat lea leamaš lossa proseassa ovtta láhkái máŋga jagi badjel, mii lea álo leamaš duogábealde muldreme ja lureme.
Nu dadjá Ája-joavkku musihkkár Kai Somby.
Maŋemus vihtta jagi lea Kai Sombyi leamaš morašlaš ja losses áigi, muhto dál son lea ovttas Roger Ludvigseniin viimmat almmuhan Ája EP-skearru.
Ája-joavkku musihkkár ja saksofonista Harald Devold jámii guovvamánu 19. beaivvi 2016, son lei guhkit áigge buohcan borasdávddas.
– Moai buohccáime oktanaga Haraldain. Buozaime juste seammá láhkai máŋga mánu. Mun bessen ja Harald ii beassan, dadjá son.
Vihtta jagi maŋŋel, beaivvát ala, almmuhii Kai Somby sudno maŋemus musihkkaovttasbarggu.
– Dego hávkadit olbmá
Kai muitá bures go su olmmái čuojahii solo «Čáhppes Dolla» dahjege «The Black Flames» šukŋii 2014:s. Harald fertii ain vuoiŋŋastit báddedettiin.
– Son spillii dan solo ja vuoigŋa doppe gaskkohagaid ja fas čuojaha veaháš ja nie. Dat lei hui ártegis ja lagaš dovdu.
Birrasiid jagi maŋŋel go Harald jámii, čohkkái Kai akto ruovttus, Kárášjogas.
– Mun čohkkájin ja guldalin dušše dan sakssolo ja šadden čuohppat eret daid vuoigŋanjienaid, go Harald vuoigŋa. Die lei hui ártet ja imašlaš dovdu go dat lei dego váldit vel dan maŋemuš heakka mii lei olbmás eret, go gullui vuoigŋame gaskkas.
Vaikko dát bargu čuozai, de fertii dahkat dan.
– Muhto dat lea beare nie. Dat eai galgga gullot doppe. Nu dat lei. Dat lei hui imaš okto čohkkát ija ja dahkat dien.
Heavy rockár ja jazz-olmmái
2009:s mearrideigga Kai ja Harald ovttasbargat ja álggaheigga Ája-joavkku, maŋŋel go leigga čuojahan fárrolaga máŋgga konsearttas, earret eará girkokonsearttas.
– De logai Harald ahte moai fertejetne álggahit joavkku.
– Mun lohken; jua, dat gal livččii somá. Maid moai galge čuojahit?
– Mun jurddašin oainnat ahte mun lean heavyrockár ja son lea jazz-olmmái. Dát sáhttá oainnat šaddat hui somás miksa.
– De logai Harald ahte moai galge álgit čuojahit elektronica
– Elektronica? Manne moai dan galge čuojahit? Mun in liiko dasa nu bures.
– De logai dan dihte go moai ean máhte dan.
– Mun jurddašin dieđusge. Dalle ii šatta datge, dat šaddá mii nu.
Golggotmánus 2011:s álggaheigga almmolaččat Ája duo-joavkku.
Čáhppes dolla - borasdávdda dáistaleapmi
Soai bargagođiiga «Čáhppes Dolla» ja «Vuoiŋŋat Čurvot» lávlagiiguin 2010:s juo, muhto Harald háhppehii guođđit Kai ovdal go válbmiiga lávlagiid.
– Mun ledjen ovtta gaskka measta bidjan eret dieid, muhto de logai Roger ahte moai válde ja barge viidáseappot dieiguin ja gárvejetne daid, dadjá Kai.
Musihkkár Roger Ludvigsen, gii ovdal lea guhkit áigge čuojahan Mari Boiniin, leaba Kai Sombyin almmuhan EP-skearru.
– Dat gal lei hui buorre geargat dáinna, lea hui guhkes prošeakta leamaš, lohká Somby.
– Dál beassá Harald vuoiŋŋastit. Dá lea su maŋimuš saksofovnna-solo mii boahtá almmuhuvvot, lohká Somby.
Somby čilge ahte «Čáhppes Dolla» šuokŋa govvida Haralda dáistaleami borasdávdda vuostá.
– Dál beasan vázzit geahppaseappot go maid lea leamaš guhkes áigái, loahpaha Ája vokalista Kai Somby.
Dás sáhtát guldalit «Čáhppes Dolla» dahjege «Black Flame» EP
