Biret Ánne Tretteskog muitala iežas bajásšaddan kristtalaš ruovttus, iige sis gal lean juovlamuorra ruovttus, danne lávejedje sii mánát hirbmadit vuordit ahte vánhenguovttos manašeigga márkanasttit vai beasašedje viežžalit juovlamuora dállui. Ja dalángo soai manaiga, de sii manne meahccái čuollat beazi.
Dán beazi sii de čiŋahedje, son ja su oabbá Máret goaruiga čiŋaid ja earát dal čiŋahedje juovlamuora.
Juovllat leat olu rievdan
Su mielas lea áigi olu rievdan dan rájes go son lei nuorra. Dalle sii manne girkostallamiidda ja čoakkalmasaide. Dokko manne sihke nuorat ja boarrásat. Ja juovlabasiide bohte olbmot Kárášjohkii girkostallamiidda.
Čoakkalmasaid áigi orru maid nohkamin. Diibmá gal vel ledje čoakkalmasat juovllaid, muhto dán jagi eai gal šatta čoakkalmasat, go eai leat ožžon sárdnideaddji, ja eaige leat olbmot geat daid lágidit.
Juovllaid riegádii beasti
Sii mánnán dihte manne juovllaid ávvudedje, go dalle han Jesus riegadii, ja son lea min beasti, muitala Biret Ánne Tretteskog. Son riegáda máilbmái beastin dihtii olbmuid suttus eret.
Dálá juovllaid ávvudit áibba earalahkai, go dál eai mánát hálá Jesusa riegádeamis eai maidige, eaige jeara iežaset vánhemiin ahte vulget go sii girkui. Dien vuohttá son dál leat áibba jávkan dálá mánáid ja nuoraid gaskas, go ii oktage hoahkal ahte galggašii girjui vuolgit juovlabasiid.