Guoimmuhan miehtá juovlamánu

Boaresbártniid birra leat dievva belljiid gullan ovdal. Daidguin leat iežaset juovlalávlagat ja muhtin báikkiin gávdno vel searvi dáidda. Dál lea Biret Márjá Lise Eira oahpistan Ávvira guldaleddjiid maiddái boaresnieiddaid máilbmái, hearvan mángasiidde.

Norske Reindriftsamers Landsforbund, NRL-U

Dá lea son guhte lea muitalan boaresnieidda ja gránnjááhkožiid fearániid birra miehtá juovlamánu.

Foto: Vaino Rensberg / NRK

Sámi guoimmuhanmáilbmái lea ihtán ođđa guoimmuheaddji, namalassii Biret Márjá Lise Eira, guhte miehtá juovlamánu gitta juovlaruhttii lea máinnastan earret eará daid olu hástalusaid birra mat boaresnieiddas leat go isitávnnas galggašii fitnašuvvat.

Dáppe gávnnat guoimmuhanráiddu (Olgguldas čujuhus)

Dát bealli ii leat ovdal gullon, eai ge sámis leat nu galle guoimmuheaddji, ja guhkin eret mat leat nissonolbmot.

Máŋgasat maid varra imaštit mas Eira fuomášii dien birra ráhkadit hearvva.

– In leat ieš čállán mánusa, lea Ávvira váldodoaimmaheaddji Kari Lisbeth Hermansen guhte lea čállán moadde jagi dassái muitala Eira.

Galgá máhttit olu unna doaimmahusas

Eira bargá ieš journalistan Ávviris, iige leat ovdal neaktán dákkáraš rolla. Sosiála mediaid bokte lea dát guoimmuhanráidu goit beakkehan.

– Jáhkkimis lea nu ahte muhtimat liikojit, earát eai. Ieš gal lean beare gullan ságaid daiguin geat liikojit. Dat lea somá, ja mun gal áinnas ain barggašin guoimmuhemiin, muhto ieš in leat gal nu čeahppi hutkat, nu ahte jus earát čállet daid suohttasiid de sáhtán mun neaktit, árvala Eira.

Unna doaimmahusas nu go Ávviris ferte olmmoš bargat feara makkár bargguid, ii ge beare ođđasiid muitalit.

– Mu mielas ii leat sámi servvodat olahan dásseárvvu majoritehta servvodagain ovdalgo mis maid ilbmet dákkár suohtasprográmmat. Eat mii sáhte beare ođđasiid ja dokumentáraid muitalit, ja mis galggašedje vel eambbo dákkáraš prográmmat, oaivvilda Eira.

Ii áddestala geange

Iežas ságaid mielde orro son válljejuvvon rollii veahá soaittáhagas, muhto mo son lea válljen neaktit dán boaresnieidda gal lea dihtomielalaš.

– Manusa logadettiin smihtten ahte šaddá láittas guldaleaddjái jus dábálaš jienain galggaš lohkat, danne lean ge ná neaktán.

Muitalettiin dán ráiddu son lea ge váldán dakkár erenoamáš suopmana. Lea váttis gullat juste gosa dát olmmoš gullá.

– Ferten deattuhit ahte in leat áddestallamin dihto olbmo, lean baicce seaguhan suopmaniid ja dadjanvugiid, nu orui mu mielas vuohkkaseamos loahpaha Eira.