NRK Meny
Normal

Juoigi, neavttár, lávlu ja ollu eará

Son lea guhká lávlon, juoigan ja neavttašan. Ja son lea maiddái leamaš sátnejođiheaddjin. Ann Jorid Henriksen lea doaimmalaš nisu.

Ann Jorid Henriksen mielde Mánáid TVs

Bala-bala Mánáid TV (1999)

Foto: NRK

ANN JORID HENRIKSEN STUDIOGUOSSIN 19.9.08

Neavttár, lávlu ja juoigi

Ann Jorid Henriksen beaggigođii 70-logus, ja Sápmi lea maŋŋel dan beassan su vásihit máŋgga oktavuođas. Son lea leamaš neavttár Beaivváš Sámi teáhteris ja lea leamaš mielde skearruin. Dán bargá son Sápmi musicas, mii gullá Musikk i Finnmark vuollái. Henriksena bargu lea ovddidit sámi musihka, ja son lea mielde mearrideame makkár artisttat ožžot konsearta-doarjaga.

Ann Jorid Henriksen Árdna TV-studios
Foto: NRK

Lei mielde fuomášeame ođđa násti

Eai soaitte nu máŋggas diehtit ahte Ann Jorid Henriksen áigá juo fuobmái muhtun nuorra sámi násti, gean olles Norga dál dovdá. The BlackSheeps lávlu Agnethe Kristin Johnsen lea mielde cdas "Sielu dálkkas", ja Ann Jorid Henriksen lei olu ovdal dan oaidnán makkár taleantta dát nieida lea. -Muhtun fertii su fuomášit, dadjá Henriksen dán nuorra táleantta birra.

Politihkkár ja kulturbargi

Ann Jorid Henriksen gullá politihkkálaččat Finmárkku Bargiidbellodahkii. Son lea čohkkán filkkadikkis ja lea leamaš sátnejođiheaddjin Unjárgga gielddas.

Kulturbargin lea Ann Jorid Henriksen leamaš miellahttun Sámi Musihkkáriid searvvis, Sámi Teáhter searvvis, Sámi dáiddaráđis, Sámi kulturráđis ja Sámi giellaráđis.

Guovssahas skearru 1980
Foto: Wenche Marie Hætta / NRK

Dá lea oassi Ann Jorid Henriksena musihkka- ja teáhtereallimis:

  • "Guovssahas" (1980). Skearru mas Ann Jorid Henriksen ja Amund Johnskareng leigga mielde
  • "Min duoddarat" (1984). Musikála Beaivváš Sámi Teáhter. Das ledje mielde vel: Iŋgor Ántte Áilu, Inge Stangvik, Amund Johnskareng ja Svein Birger Olsen
  • "Earálágan" (1993). Rocke-musikála Beaivváš Sámi Teáhter. Das leigga vel mielde Katri Somby ja Kai Somby
  • "Lávlagat Ánde ja Ristin jagi fárus girjjis". Kerttu Vuolab girji, ja dan lávlagiid lávlo: Ann Jorid Henriksen, Sverre Porsanger, Amund Johnskareng, Marry Sarre ja Kerttu Vuolab ieš
  • "Sielu dálkkas" (2006). Cd mas Johan A. Andersen ja Agnethe Kristin Johnsen (The BlackSheeps) leigga vel mielde
  • Mánáid TV ráiddut mas Ann Jorid lea leamaš mielde: Gánda ja golleloddi (1986), Ánde ja Risten jagi fárus (1991), Bala-bala (1999), Májjá ja Sujujjujá (2004). Ja lassin lea son leamaš mielde bidjame jienaid "Mummi"-ráidui (1998-2000)