Ealjáris juoigi lea vádjolan eret

Mannan vahkkoloahpa bođii diehtu ahte okta dain viššaleamos juigiin lea jápmán, 88 jagi boarisin.

Lásse Ovllá birra daddjo ahte son máhtii máŋga čuođi luođi. Ieš árvvoštalai iežas máhttit sullii 700 luođi.

Bálkkašuvvon juoigi

Lásse Ovllá searvvai Sámi Grand Prix (SPG) juoigangilvui čieža geardde. Vuosttaš háve lei 1991:s, ja dalle son juoiggastii sámi beakkálmasa Mari Boine.

Go 1995 searvvai nuppes SGP:i, de geigejuvvui sutnje Áillohaš musihkkabálkkašupmi.

Dan guđa skearrus maid lea almmuhan, de «Luđiin muitalan» skearruin vuittii Folkelarm bálkkašumi 2009:s. Buvttadeaddji Johan Sara jr vuittii ges musihkkabuvttadeaddji-luohkás.

Sara mielas lea leamaš oahppun ja gudnin Lásse Ovlláin ovttasbargat.

– Dat han lei stuorra meašttir. Sus lei máilmmi stuora gelbbolašvuohta juoiganoktavuođas, dadjá Sara.

– Ja mo dat sáhtii čiŋahit ovtta luođi, dat han lei hui erenoamáš: dat mohkohallamat ja fanahallamat ja visot diet ceahkit mat gullet luohtái.

– Justa nu go galgá dakkár dološmállet luođi – árbevirolaš luođi mielde.

Skearru, mas gullá man čeahpes muitaleaddji Lásse Ovllá lei, ilmmai 2015:s. «Soigosat Árrangáttis» lea skearru, mas gullá sihke luđiid ja dološ fearániid. Die lea dat maŋemus almmuheapmi Lásse Ovllás.

Oahpu haga birgen álo

USKAV lei searvi mii vuođđuduvvui daid sámiid dihte, geat nuppi máilmmi soađi geažil eai beassan skuvlla vázzit.

Lásse Ovllá lei mielde dán searvvis, ja son lea muitalan iežas skuvlaáiggi birra almmuhusas Sámi skuvlahistorjá 1. Das son muitala ahte militearas easka oahpai veahá dárogiela nuppi sápmelaččas. Ja loahpas son šattai vel korporálan.

• Loga USKAV birra dárogillii dás: Samer uten utdanning - 20 Ã¥rs kamp

NRK vuorkkás eanemus luođit

Lásse Ovllá skearruin leat ollu báddejuvvon luođit, muhto NRK vuorkkás leat vel eanet báddemat suinna. Badjel 240 luođi leat dássážii digitaliserejuvvon, muhto doppe leat ain luođit mat leat dušše dološ báttiin.

90-logus dat lei Lásse Ovllá NRK studios báddeme luđiid, ja das šattai somás fearán. Jietnabargi lei dáčča, guhte ii diehtán nu ollu juoigama birra.

Go báddi lei jorran guhká, de dajai jietnabargi iežas bargoustibii: Dál gal diet olmmái lea juoigan dan seamma luođi beannot diimmu!

Buvttadančálli Karen Anne Kildedam muitá dien bures. Son dat dárkkistii luđiid maŋŋel báddema.

– Go mun guldalin báddemiid, de fuomášin ahte ledje 2-3 luođi maid Lásse Ovllá lei juoigan eanet go oktii, muitala Kildedam mojunjálmmiid.