– Amma hal dat sámi diibmobealli lea šaddan jahkebeallin, leaikkasta Eira.
Dán jagáš Sámi Grand Prix juoiganoasi vuoiti muitalii moatti vahku dassái
ahte ii lean vel ožžon mávssu ja dát orui su mielas imaš.Dál duođašta duođašta John-André Eira iežas ožžon dan 20.000 kruvnna sturrosaš juoiganoasi vuoitomávssu.
Son lea duhtavaš mávssuin, muhto ii dainna go nu guhkes áigi mannan gilvvu rájes.
– Moattis fertejit vuordit
Sámi Musihkkafestivála vuođđudusa stivrajođiheaddji, Ellen J Sara Eira, muitala iežaset dál nagodan máksit buot velggiid mat gullet eaŋkilolbmuide.
– Moadde ásahusa, nu go suohkan, fertejit vuordit dassážii go Sámedikkis boahtá sidjiide dat loahpparuhta, várra dál jo borgemánus, dadjá Eira.
Son dovddasta rahpasit, ahte Sámi musihkkafestivála dán jagi lea veahá rahčan ruđalaččat.
– Mis leat leamaš likviditehtaváttisvuođat ja danne leat maŋŋonan mávssuiguin, čilge stivrajođiheaddji Ellen J. Sara Eira.