Biret Per Márgget, Margit Varsi, lea mánnávuođa rájes juoigan ja luohti lea sutnje hui mávssolaš. Son lea Deanus eret muhto ássá Unjárggas gos lea juo ássan 33 jagi.
Lei eatni gii oahpahii su juoigat, áhči son ii gal goassege gullan juoigamin ovdalgo áhči boarásmuvai ja vajálduhttigođii.
Biret Per Márgget juoigá maid Alit Várri nammasaš juoigan CD:s ovttas iežas nieiddain ja mánáidmánáin.
Juoigit suddudedje, dážat eai
Biret Per Márgget lohká mánnávuođas gullan mo earát cuiggodedje juoigama daningo sin mielas juoigan lei suddu. Dážat cuiggodedje sin geat juige daningo eai ádden man birra sápmelaččat juige, lohká son.
Son lávii imaštallat ahte manin dat nie lei ahte go sápmelaš juoiggai de návdui dat suddun, muhto go dáža lávllui ja geavahii vaikko makkár sániid, de lei dat ortnegis.
Sáhttá vel namuhit ahte ollu guovlluin Sámis lea juoigan áigá juo jávkan nugo ovdamearkka dihti Muorralis Muosát gielddas.
Luohti riegáda barggus
Luohti vuolgá juohke áššis mainna olmmoš bargá. Go olmmoš smiehttá dan botta go bargá de riegádit jurdagis ođđa luođit, lohká Biret Per Márgget, Margit Varsi. Go olmmoš beassá bargat dainna mainna olmmoš liiku de han dat maid buktá ođđa luđiid. Earenoamážit meahcis luovvanit ollu luođit, lohká son.
