NRK Meny
Normal

Juoigan Ijahis Ija fáddán

Eamiálbmogiid musihkkadáhpáhus Ijahis Idja-festivála álggii odne Anáris Ima Aikio mánáid-CD almmuhankonsearttain.

Ijahis idja 2013, Enare, Finland

Bearjadga lea mánáid ja nuoraid beaivi Ijahis Ija festiválas.

Foto: Sergey Gavrilov / Gavrilov Media

Dán jagáš festivála prográmma lea viidát go goassege ovdal ja bistá golbma beaivi.

Sis leat olu beakkán artisttat ja juoigan lea guovddážis. Okta dain artisttain lea Wimme Saari, guhte geavaha iešguđetlágan juoiganteknihkaid.

Vilda Duoddarat temá

Festivála buvttadeaddji Oula Guttorm muitala, ahte dan jagi temá lea Vilda Duoddarat juoigan. Sii háliidit čalmmustahttit erenomážit oarjjabeale sámeguovllu luohteárbevieru.

Bearjadaga mánáid- ja nuoraidbeivviin Juoigiid searvi lágida «Juoiggas fal» juoigankurssa Sajosis.

Lávvordaga ges lea «Vilda Duoddarat» musihkkaseminára Siidda auditorias, mas sáhkavuorut gieđahallet juoiganárbevieru, luođi mearkkašumi ja dan ovdanbuktima árbevirolaččat ja ođđamállet vugiin.

Earet eará Wimme doallá sáhkavuoro ja nu maid Juoigiid searvi jođiheaddji Biret Risten Sara.

– Mun han lean mun ja ná mun dagan

Wimme Saari

Wimme Saari áigu Ijahis Ijas guoimmuhit okto. Dušše gitára lea sus mielde.

Foto: Maarit Kytöharju / Pressebilde

Wimme Saari lea dovddus su persovnnalaš juoiganvuogi dihte mii ovttastahttá su iešhutkan, ođđamállet lávlunvugiid árbevirolaš juoigamii.

– Mun háliidan leat dušše nu go mun lean. Dalle go ledjen nuorra mun geahččalin gal ahte máhtán go geavahit mu jiena nu go vaikko Áillohaš ja eará juoigit, muhto in hal mun máhttán. Ja de mun jurddašin ahte naba jus mun juoiggašin iežan jienain. Ja de mun gávnnahin ahte lea buot buoremus juoiggastit iežan jienain. Ja jus mun in dohkke dakkárin go mun lean, nu de maid dasto. Muhto dainna mun lean birgen goitge, lohká Saari.

Son ii leat dábálaš árbevirolaš juoigi guhte láve juoigat sámiid ja luonddu birra. Okta su dovdoseamos luohti lea Texas, mii heivege bures festiválaide.

– Ii hal dat luohti leat dainna lágiin ahte dat lea čadnojuvvon. Olmmoš go johtá de fuobmá feara maid, ii hal leat das gitta lea go sámi guovlu vuoi lea go gosnu eará máilmmis johtimen. Dovddut hal dat leat. Ja nu ahte, jus mun in máhte sániiguin muitalit juoidá, nu de mun sáhtán juoigat dan, čilge Saari.

Goalmmát geardde Ijahis Ijas

Wimme lea guktii doallan konseartta Anáris Ijahis Ija-festiválas.

2004:s goarkŋui son girjerádjosa robi ala, go festivála lágiduvvui Anáris vuosttas háve.

– Dat lei danne go mun oidnen dan unna lávddáža inge háliidan dies čuojahit. De oidnen dan gáhtu ja jurddašin ahte dohko han mun manan go dalle olbmot oidnet ja gullet mu buorebut. Dál mus lea gitára mielde, nu ahte jurddašin doallat dakkár trubadura konseartta. Dábálaččat olbmot leat oaidnán ahte mus lea čuojahanjoavku mielde, muhto dan háve mun geahččalan ieš čuojahit, boagusta Wimme.

Jon Henrik Fjällgren

Jon Henrik Fjällgren besseŧ Ijahis Ijas gullat juoigamen bearjadaga eahkeda.

Foto: Vaino Rensberg / NRK

Fjällgren Suoma debuta

Bearjadaga loaiddasta festivála váldonásti ruoŧa beal sápmelaš taleantavuoiti Jon Henrik Fjällgren.

Oula Guttorm dieđuid mielde, dát lea vuosttaš háve go lullisámi beakkálmasas lea konsearta Suoma bealde. Ja Guttorm illudage go viimmat son boahtá Supmii.

Vaikko váldokonsearta lea ge lávvordaga, de doallá Fjällgren sierra konsearta bearjadaga Sajosa auditoriumis.

– Dat lea dan sivas, go vaikke mii várriimet su jo hedi maŋŋel juovllaid, sus lei dalle jo sohppojuvvon nubbi konsearta lávvordahkii, nu ahte áidna vejolašvuohta lei bidjat sutnje sierra konseartta bearjadahkii.

Eará beakkán sámi artisttat

– Vuos mis lea Arvvas konsearta Sajosis. De váldokonsearta álgá eahkedis. Doppe leat máŋga juoigi mielde, Minga, Juoigiid searvi, Elle Marja Eira, Wimme, Somby ja Mollet, lohká Guttorm.

Ijahis Idja lágiduvvo dán jagi 12. háve ja festivála lea juohke jagi stuorron.

Buvttadeaddji Oula Guttorm sávvá ahte maiddái dán jagi oasálastet ollugat festiválas.

Čuovvut neahta bokte

Ijahis ija sáhttá čuovvut neahta bokte. Váldokonsearta streamejuvvo lávvardaga 15.8. diibmu 17.55 ovddosguvlui ja Jon Henrik Fjällgrena konseartta streamejuvvo bearjadaga 14.8. diibmu 18.55 ovddosguvlui.

Dá lea liŋka bearjadaga ja lávvordaga streamii: http://www.sogku.fi/live/