NRK Meny
Normal

Juogada váibmoárbbis earáiguin

Julevsápmelaš Karl Edvard Urheim lávlu julevsámegillii sálmmaid ja vuoiŋŋalašlávlagiid CD:ii. Son illuda go beassá váibmoárbbis juogadit earáiguin.

Karl Edvard Urheim

Karl Edvard Urheim lávlu váibmoárbbis CDii

Foto: Sara Kristine Eira Lantto / NRK

Son ráhkista váibmoárbbis, mii lea sálbmalávlun. Danne áigu son lávlut julevsámi sálmmaid ja vuoiŋŋalašlávlagiid CDii. Alvvat AS dat galgá buvttadit ja almmuhit Urheima CD, maid Sámediggi ruhtada 140 000 ruvnnuin.

Moskilaš ráhkista sálbmalávluma

Karl Edvard Urheim lea eret Moskis Divttasvuonas, muhto orru Stravvasnjunis Hápmiris. Dál son lea maŋimuš jagi musihkkastudeanta Tromssas ja lea 45 jagi boaris.

Iežas muitala mánnávuođas hárjánan lávlut sálmmaid ja vuoiŋŋalaš lávlagiid, danne muitala lávluma alddis leat váibmoárbin.

Dál go beassá julevsámegillii lávlut CDii, de lea dát sutnje oalle erenoamaš. Dalle besset dáid sálmmaid gullat vaikke gii olles máilmmis. Son navdá iežas sálbma CDa leat dat vuosttaš sálbma CD, mas gullá julevsámegillii sálmmaid ja vuoiŋŋalaš lávlagiid.

CD almmustuvva čavččabeallái

Karl Edvard Urheim illuda dassá go sálbma CD almmustuvvá, muhto ii jáhke gal CDa gárvánit ovdal go čavččabeallái. Su gohčodit maid Kalle Urheiman.

Gula Karl Edvard Urheim