Mun gal in biđe guoddit juoŋastanbiergasiid Njárgajávrái, čilge Jan Ole Buljo.
Foto: Eilif Aslaksen / NRKJan Ole Buljo lei ráhkkanan váldit vahkkosaš luomu vai beassá juoŋastit Njárgajávrris ja Váidejávrris, nu go son láve juohke čavčča.
Dán vuoro ii dáidde beassat jávrebivdui, ballá son.
- Loga maid:
- Loga maid:
Finnmárkku fylkamánni birasgáhttenossodat dat lea gidden guovllu geassejohtolatmáđi gaskaboddosaččat.
– Dan sii leat dahkan vai Joahkonjárgga orohat bálle ráfis johtit bohccuiguin dálveorohahkii, čilge fylkamánni boazodoalloossodathoavda Trond Aarseth.
– Guovllus lea stuorra ráfehisvuohta
Stuorra mohtorjohtologa geažil dáppe lea leamaš ollu ráfehisvuohta. Boazodoallohoavda Trond Aarseth muitala ahte guovllus dasa lassin lea leamaš ollu suolanjuovadeamit.
– Danne lea maiddái bearráigeahču geažil dehálaš giddet mohtorjotolaga guovllus, akkastallá Aarseth.
– Kollektiiva ráŋggáštus
Finnmárkku fylkamánni ossodathoavda Trond Aarseth ii jáhke johtolatgieldosa stuorrát váikkuhit čakčajuoŋasteapmái. – Gielddus han lea dušše gaskaboddosaččat, son akkastallá.
Foto: Nils Henrik Måsø / NRKDan čilgehusa Jan Ole Buljo ii dohkket.
– Jus muhtun suoláda maid nu, de han eai sáhte ráŋggáštit earáid go bahádahkkiid. Go ná giddejit mohtorjohtolaga, de dat lea kollektiiva ráŋggáštus, lohká Buljo.
Joahkonjárgga orohat dat lea bivdán filkamánni giddet mohtorjohtolaga. Vaikko gielda lea vuostálastán giddema, de fylkamánni dattege lea mieđihan giddet buot mohtorjohtolaga gaskaboddosaččat skábmamánu álguii, dassái go eai leat šat bohccot guovllus.
Seammás go Aarseth ádde go dálonat moitet giddema, de dáhttu son maid áddejumi dasa ahte guovllu boazodoallit dáhtošedje ráfis johtit dálveeatnamiidda.
- Guldal:
