Hopp til innhold

Huksen maŋida journalistaoahpu

Muhto Sámi Allaskuvla fállá radiojournalistaoahpu boahtte giđa rájes.

Diehtosiida - Samisk vitenskapsbygg
Foto: Åse Pulk / NRK

Okta sivva go eai álggat oahpu dán čavčča, lea go Diehtosiida, gos journalistaoahppu galgá leat, ii gárvan ovdal 2009:s.

GULDAL: Sámi journalistaoahppu ii álggahuvvo

Steinar Pedersen
Foto: Erichsen, Jarl Fr. / SCANPIX

Stivračoahkkimis distaga mearridedje ahte ollislaš sámi journalistaoahppu ii álggahuvvo ovdal 2009 čavčča.

Váilot rusttegat ja lanjat

Sámi Allaskuvlla rektor Steinar Pedersen lohká dán juo leamaš guhkitáigge plánain.

– Nu go dilli lea dál, de ii leat obanassige vejolaš álggahit dán oahpu, go rusttegat ja lanjat váilot, dadjá Pedersen

Mediaásahusat dárbbašit journalisttaid

Pedersen diehtá ahte lea stuorra dárbu sámi journalisttaide, ja sámi mediaásahusat leat ávžžuhan álggahit fas oahpu. Ja sis lei ge dat muittus go digaštalle lea go vejolaš álggahit oahpu árabut vai ii.

– Diehtit ahte lea dárbu journalisttaide sámi mediaásahusain, muhto mii leat maiddái geatnegahtton lahčit oahpu vai leat buot buoremus vejolašvuođat čađahit dan oahpu albmaládje, dadjá Pedersen.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.