Journalista Nils Henrik Måsø lea jápmán

Les på norsk

Måsø barggai guhká Ságat-áviissas journalistan ja Deanu guovllukantuvrra jođiheaddjin.

Jagi 2001 son šattai Min Áiggi váldodoaimmaheaddjin. Viđa jagi maŋŋel álggii NRK Sápmái.

Guhkes bargoeallimisttis son lei mielde loktemin sámegiela árvvu ja ovddideamen sámi áššiid. Diibmá son manai ealáhahkii.

Måsø lei servodatberošteaddji ja gaskkohagaid politihkkii maid. Son gulai Guovddášbellodahkii.

Måsø lei earret eará Sámedikkis, Finnmárkku fylkkadikkis, Deanu várresátnejođiheaddjin, Finnmárkku Guovddášbellodaga jođiheaddjin ja Guovddášbellodaga riikkastivrras.

Morrašis

NRK Sámi direktevra Johan Ailo Kalstad lea čállán dáid muitosániid:

«Go olbmuiguin ovttasbargá bargosajis, de čatnasit oktavuođat. Fárrolaga beassat dávjá vásihit sihke suohttasiid ja váivviid, mat váikkuhit min eallimii.

Dán vahku leat ollugat mis morrašis go oaččuimet jápmasága ovddeš bargoustiba Nils Henrik Måsø birra.

Ieš vázzen journalistaoahpu suinna fárrolaga guoktelogi jagi áigi ja lei lossat gullat su eretvádjoleami birra. Son lei dalle juo hárjánan journalista, guhte dovddai sámi servodaga bures iešguđet doaimma bokte. Goitge háliidii ain ovdánit ja eanet oahppat. Son lei midjiide nuoraide nana ovdagovvan ja doarjjan olu áššiin.

Dieđán ahte son maid lei árvvus adnon bargoustit ollugiidda dáppe NRK Sámisge. Lean gullan ahte son veahkehii ja doarjjui vaikko goas. Juogadii iežas valjis máhtus ja háliidii aivve fal buori earáide. Mii váillahit su.

Losimus lea aŋkke su lagamuččaide. Jurdagat leat vuosttažettiin su bearraša luhtte. Ja jurddašit earenoamážit su bártni Jan Rune birra, guhte lea min bargoustit.

Vare gávnnašeiddet jeđđehusa.

Nils Henrik hávdáduvvo bearjadaga. NRK Sámi bealis cealkit maŋemus dearvvuođaid mis buohkain.»