Les på norsk / Loga dárogillii.
Vuossár’eahkeda almmuhii ođđasisatnin-áppa, Tise, gilvvu mas lea vejolašvuohta vuoitit Joika-gálvomearkkain merkejuvvon biktasiid.
Biktasiin lea dovddus Joika-logo. Dát logo gullá beakkán mearkagálvui, mii lea leamaš Norgga buvddain 60-logu rájes.
Dalle go Joika geavahišgođii earálágan burkke, de ásahii maiddái ovttasbarggu Tise-fitnodagain.
Tise lea applikašuvdna, man bokte lea vejolaš oastit ja vuovdit geavahuvvon biktasiid neahtas. Norgga beakkálmas Jenny Skavlan, lea okta fitnodaga eaiggádiin.
Maŋŋel go Tise moitojuvvui, de jávkadedje Joika-gova, man ledje almmuhan iežaset Instagram-siiddus. Gilvvu eai leat vel heaittihan applikašuvnnas, vaikko vel gova leatge jávkadan.
– Árvvus atnit min kultuvrra
– Mii bivdit sin árvvus atnit sámi kultuvrra ja vuhtiiváldit min rievtti defineret iežamet ja movt mii dáhttut iežamet ovdanbuktojuvvot, dadjá Sámiráđi kulturossodaga jođiheaddji Christina Hætta.
Sámiráđđi lea politihkalaš organisašuvdna, mii ovddida sápmelaččaid Suomas, Norggas, Ruoššas ja Ruoŧas.
Sii oaivvildit ahte «Joika» biergogáhkuid designa govvida sápmelaččaid stereotiippalaččat ja doalaha karikatuvrralaš ja eksohtalaš gova sis.
Kultuvrralaš appropriašuvdna
Nortura ja Tise leaba dál čoahkkinastimin ja mearrideamen galget go joatkit ovttasbarggu vai eai.
«Lehpet go jurddašan ráhkadit eará kollekšuvnnaid, main minoritehta olbmot govviduvvojit karikatuvrralaččat», lei okta kommentárain Instagramas.
Nordlys áviisa dat namuhii ášši álggos.
Eanaš cuiggodeamit guske kultuvrralaš appropriašuvdnii. Dát lea doaba, mii mearkkaša ahte juoga váldo ovtta kultuvrras ja geavahuvvo eará kultuvrras.
– Vealahan-designa
Artista ja servodatberošteaddji Ella Marie Hætta Isaksen, gii lávlu ISÁK joavkkus, lea maiddái searvan digaštallamii.
Son moaitá Joika ja Nortura, ja oaivvilda sin galgat rievdadit sihke nama ja logo.
– Sii leat rievdadan burkke, muhto eai leat rievdadan vealahan-designa, dadjá Hætta iežas Instagramas.
Tise-gilvvus sáhttet earret eará vuoitit baskkes báiddi, oanehis báiddi ja gahpira, mas lea Joika-mearka.
«60-logu stereotiippat»
Sámiráđi Christina Hætta oaivvilda borramušgálvvu gullat ovddešáigái.
«Mii sápmelaččat háliidat beassat eret 60-logu stereotiippain ja joikagáhkuin (main dušše lea 17% bohccobiergu), čuožžu mu to-do-listtas», čálii Hætta Tise-siiddus.
Sámiráđđi sihtá dál Tise loahpahit olles kampánjja.
Tise ii leat vástidan dása. Sii eai loga alddiineaset eanet dieđuid go dan maid leat vástidan Nordlys-áviisii.
«Mii leat mearridan sihkkut Instagram-poastta go olbmot leat moaitán ja atnán dan kultuvrralaš appropriašuvdnan ja dat lea bávččagahttán ja loavkašuhttán olu olbmuid. Mis ii lean jurdda loavkašuhttit geange ja mearrideimmet sihkastit dán poastta, čálii Tise márkanhoavda Victoria Hauk áviisii e-poastta bokte.
NRK lea váldán oktavuođa Norturain, geat vuvdet Joika-buktaga. Sii atnet váidalahttin go buvtta lea loavkašuhttán ja eaddudan olbmuid.
– Sii hirpmástuvve go Tise moitojuvvui dán ovttasbarggu dihtii. Dán mii váldit vuhtii viidáset barggus, dadjá Nortura gulahallanráđđeaddi Marthine Haugen Petersen.
Son lasiha vel ahte Nortura leat plánemin ođasmahttit Joika-buktaga designa.