Johs. Kalvemo: – Dál de lea mu namma almmolaččat buhtistuvvon

NRK Sámi journalista Johs Kalvemo logai giitosártnistis, ahte Gonagasa ánsumedálja geigemiin lea vákšun su vuostá dego buhtaduvvon.

Johs. Kalvemo

Johs. Kalvemo lea maŋimuš 12-13 jagi ássan Oslos Mátta-Norggas, ja su mielas lei vuogas beassat davvin fitnat Gonagasa ánsumedálja juohkima oktavuođas.

Foto: Dan Robert Larsen / NRK

GEAHČA VIDEOID VUOLIMUSAS ÁŠŠIS!

Guovdageaidnalaš juoigi Elle Rávná Triumf álggahii ievttá ávvueahkeda «Johs Kalvemo luđiin», muhto eahkeda váldodáhpáhus lei diehttalasat Gonagasa ánsumedálja geigen.

Medálja geigii NRK-sáddehathoavda Thor Gjermund Eriksen allaárvosaš juohkinmeanuin Kárášjogas.

(Ášši joatkašuvvá gova vuolábealde)

Elle Rávná Triumf

Elle Rávná Triumf juoiggastii «Johs Kalvemo luođi» sápmelaš journalistasáŋggára gudnin.

Foto: Dan Robert Larsen / NRK

– Dearvvuođat vákšunbolesiidda

Giitusártnistis doalai Kalvemo dárogillii, vai NRK-sáddehathoavda (kringkastingssjefen) ja eará dárogiellagat sáles áddejit dan maid son dadjá.

– Go šadden gillát Norgga vákšunbolesiid vákšuma 20 jagi, de lea Gonagasa ánsumedálja munnje dego buhtadussan. Dát medálja leat dego dearvvuođat vákšunbolesiidda.

Johs. Kalvemo

Johs. Kalvemo Stuorradikkis.

Foto: NRK

Johs. Kalvemo lei okta sápmelaččain geaid Norgga vákšunbolesat registrerejedje ja dolle erenoamážit čalmmis 1960-vuođđalogus gitta 90-jagiid álgui. Vákšuma gillájedje sihke sápmelaš servodatnjunnožat, politihkkárat ja áktivisttat.

– Dat ledje vissa gávnnahan, ahte mun dal livččen maidige lobihis bargguid dahkan. Mun lean rehálaččat bargan journalistan ja ožžon beaivečuvgii áššiid mat leat leamaš, erenoamážit Ruošša bealde, nuoskkideamit ja buot diet, čilge Kalvemo NRK:ii.

Jussá eamit lei dan eambbogo čuođi guossi gaskkas ievttá ávvudeamis NRK Sámi boradanlanjas Kárášjogas. Doppe lei maid sutno nieida ja bárdni. Kalvemo lohká, ahte lei buorre sin oaidnut ja gullut oažžut namas buhtistuvvot almmolaččat.

Reportáša ávvueahkedis go Johs. Kalvemo oaččui Gonagasa ánsumedálja.

GEAHČA VIDEO: NRK-sáddehathoavda Thor Gjermund Eriksen geigii ikte Gonagasa ánsumedálja Johs. Kalvemoi. Kalvemo geavahii liibba cuiggodit dango son vákšujuvvui 20 jagi.

– Olbmot hálle dan birra, ahte leago son Jusse dahkan makkárge vierrivuođa, muhto dálgo Gonagasa ánsumedálja oaččun, de lea fas dego loktemin fas mu bargoárvvu, dan maid mun lean bargan. Dat addá fas munnje dan movtta, ahte go Gonagasa ánsumedálja oaččun, de čájeha dat ahte mu bargu lea dohkkehuvvon, oaivvilda Kalvemo.

En miks fra Johs. Kalvemos dokumentarer.

GEAHČA VIDEO: Dás oainnát oasážiid Johs. Kalvemo prográmmabuvttadeamis. - Vuorkásnuoggan: Samuel Frode Grønmo - Čuohppan/hábmen: Samuel Frode Grønmo ja Dan Robert Larsen