Marianne Blind Svensson livččii háliidan eambbo olbmuid márkaniin. Son bargá Johkamohkis, muhto orru dastán olggobealde.
– Olbmuid lohku lea unnon ja gávpeolbmot leat unnon. Lávii leat nu suohtas go leat ollu olbmot. Go nordat šaddá nuppiid go vázzá márkan čađa.
UHCCÁŠA: Marianne Blind Svensson váillaha eambbo olbmuid márkaniin.
Foto: Berit Nystad / NRK– Mii han orrut nu viiddis eatnamiin ahte lea muhtimin buorre ollu olbmuid siste leat, lohká Marianne Blind Svensson ja máksá suohpana. Ii ge dat leat dábálaš suohpan, muhto dološáigásaš bihkkaduvvon, čilge.
– Dás lea mánnávuođa hádja, dadjá Lisa Maria Blind gii maid lea oastán bihkkaduvvon suohpana ja havssaša dan. Irgi vel ii dieđe, muhto diet galgá leat Lisa Maria márkanskeaŋka sutnje.
Oahppásiid deaivat
Johannes Kuhmunen ássá Várggás Arvvesjávrris,. Son boahtá juohke jagi márkaniidda, oahppásiid deaivat ja singuin háleštiit.
Ja áiddo go čákŋala Sámij åhpadusguovdásj:i gos ollu sámi ásahusain leat gálvobeavddit, doppe lea Juvva Ante Utsi girjjiid vuovdimin. Dearvvahaddaba ja ságat vulget sudnos.
Olusat bohtet seamma earániiguin go Johannes, muhto maiddái gávppašit. Ja ođđa oahppásiid gávdnat.
– Čiŋaid ja silbbaid geahčadit, ja fulkkiid oaidnit, lohká guovdageaidnolaš Inger Anita Saari. Dan dihtii lea gul son dáppe márkanastimin.
Dás oainnát govaid dain geaid deaivvaimet márkaniid nubbin maŋimuš beaivvi.
Tienas
Vaikko čielga logut eai gávdno, de meroštalle gávcci jagi áigi ruhtajođu márkaniid áiggi leat 97 miljon kruvnna.
Márkaniid preassaovddasvástideaddji Birgitta Nilsson jákká logu leat lassánan ja árvala ahte dál lea sáhka badjel 100 miljon kruvnnas.
Johkamohkis ásset birrasiid vihtta duhát olbmo. Márkaniid áiggi lávii lassánit gitta 40.000 olbmuin. Dahká go dán jagi maid dan, eai dieđe vel dadjat ovdal maŋŋá márkaniid.
