Johkafanas gopmanii - dievdu gávdnon duššan

Dievdu gávdnui jogas, sullii 20 mehtera eret báikkis gos jávkái, lohká Finnmárkku politiijaguovddáža operašuvdnajođiheaddji, Tarjei Leinan Mathiesen.

Son muitala ahte dievdu lea váldon gáddái norgga bealde.

Dievdu gávdnui badjelaš diibmu 10 odne ovdalgaskabeaivve.

60-jahkásaš dievdu dieđihuvvui láhppon mannan ija maŋŋel go johkafanas gopmánii Suoma ja Norgga rádjajogas Anárjogas, Kárášjoga gielddas.

– Fatnasis ledje guokte olbmo. Nubbi nagodii beassat gáddái. Nubbi fas manai fatnasa mielde vulos, muitala Finnmárkku politiijaguovddáža operašuvdna jođiheaddji Torfinn Halvari.

Darvánii fatnasii

Lihkohisvuohta lea dáhpáhuvvan go dievddut leigga bidjame fatnasa johkii.

– Fanas gártái doarrás ja soai eaba de leat nagodan doallat fatnasa ja nubbe dievdu gárttai johkii ja darvánii fatnasii, lohká Halvari.

Dat nubbe dievdu beasai gáddái suoma bealde, ja dieđihii lihkohisvuođa birra Suoma heahteguovddážii. Go dievdu fas bođii johkagáddái lei dat nubbe dievdu jávkan.

Ohcan helikopteriin

Politiijat ožžo dieđu lihkohisvuođa birra váldogádjunguovddážis diibmu 00.55.

– Váldogádjunguovddáš sáddii Sea- King helikoptera báikái, mii lea girdán báikki badjel, lohká Halvari.

Ovdalaš diibmu čieža ollejedje politiijat báikái gos dievdu lei maŋemus oidnon, ja álge ohcat su.

Ohcan sihke Suoma ja Norgga bealde

Ovdalaš diibmu čieža ollejedje politiijat báikái gos fanas gopmánii, sullii čieža miilla lulábealde váldogeainnu.

Gádjunveahka ozai dievddu johkagáttis sihke norgga ja suoma bealde, johkafatnasiiguin ja gummefatnasiiguin.

– Mii leat ožžon veahki Deanučázádaga guolástanhálddahusa johkavávttain, geat dovdet guovllu bures, muitalii Halvarii viđa áigge iđđes.

Gádjunakšuvdna lea dál loahpahuvvon, ja politiijat leat dutkame ášši vai ožžot čielgasii mii lea dáhpáhuvvan.