Kárášjoga Joatkkaskuvla rihkkon lága

Sámeskuvllaid stivrrajođiheaddji Anton Dahl, ii mieđit rektora okto sivalažžan boasttuvuođaide, vaikke rektoris leage váldoovddasvástádus,

go Nrk Sápmi jearai mo su mielas leat rektor doaimmahan barggus go oaidná dan Finnmárkku Fylkkamánni varas rapporta.

Skuvla rihkkon lága máŋgga geardde

Dat čájeha skuvlla leat rihkkon lága máŋgga geardde, skuvlavázziid psykososiálalaš skuvlabirrasa áimmahuššama olis.

Skuvlla njunnošat eai leat doarvái bures fuolahan dán barggu.

Kárášjoga joatkkaskuvlla, áiddo dubmejuvvon rektor, ii leamaš fidnemis ságaide ikte, iige otne. Stivrrajođiheaddji ii mieđit iežaset suodjalan rektora.

Cuiggodussan stivrii

Fylkkamánniraporta lea maid njuolgga cuiggodussan stivrii go dat duođašta ahte eai čuovo doarvái bures mielde mot skuvla jođihuvvo.

- Čájeha go dát ahte stivrii lea leamaš eambbo dehálaš suodjalit rektora go bearráigeahččat ahte njuolggadusat čuvvojuvvojit?

- Dat gal ii leat riekta, dat gal lea áibbas boastut dadjat, šiitá Dahl.

– Stivra ii leat fágaserviiguin ráđđádallan

Skuvllaid riikkalihtu báikkálaš jođiheaddji, Olav Sara Nikkinen, iige mieđit dán rapportta čuohcat dušše rektorii ja lohká stivrra maid sivalažžan dasa go ná lea geavvan sin skuvllas.

Son ii leat maid duhtavaš, go rektora diggeášši ja dan dubmejuvvon dili olis, ii leat stivra singuin fágaserviiguin ráđđádallan.