Risten Rávna Länsman (28) lea bajásšaddan rádjajohkagáttis Deanuleagis. Borgemánu 1. beaivvi rájes váldá son badjelasas jođihit Sámi ofelaččat doaimma, man Sámi allaskuvla jođiha.
Risten Rávna Länsman oaidná barggus stuorra hálstalusaid ja somás bargobeivviid oaivámuššan Sámi ofelaččaide.
- Issoras movtta
- Mun lea issoras movttet go beasan bargat Sámi ofelaččaiguin. Prošeakta šattai dovddus ovdalgo dat árvvoštallama maŋŋá šattai bissovaš doaibman. Šaddá gelddolažžan váldit badjelasan doaimma mii ná bures lea lihkostuvvan jo ovdelaččas, dadjá ođđa ráđđeaddi, Risten Rávna Länsman.
Risten Rávna Länsman lea bajásšaddan boazodoalus Suoma Sámis. Son lea gazzan oahpu Sámi allaskuvllas ja lea adjunkta lassioahpuin, duodji ja oahpponeavvopedagogihkka fágan.
Guovdageainnus lea Risten Rávna orron 2004 rájes ja sus lea njeallje-jahkásaš nieiddaš. Sámi allaskuvllas lea son bargan 2005 rájes, muhto lonuha dál kántuvrra go váldá badjelasas Sámi ofelaččaid jođiheami.
Nuorra diehtojuohkit
Sámi ofelaččat lea ovttasbargodoaibma Norgga Bargo- ja Searvádahttindepartemeantta (BSD) ja Sámi allaskuvlla Guovdageainnus gaskkas.
Golbma válljejuvvon sámi nuora ožžot oahpu Sámi allaskuvllas ja de mátkoštit skuvvlain miehtá riikka, ja muitalit nuoraide sámi kultuvrra ja servodaga birra.
Dát lea doaibma mas nuorat juhket dieđuid eará nuoraide. Sámi allaskuvlla bargá dan guvlui, ahte ofelašdoaibma viiddošii maid Supmii ja Ruŧŧii.
Vássán jagi leat golbma nieidda doaibman sámi ofelažžan.