NRK Meny
Normal

Jane Astrid Juuso oadtju Sámedikke giella­arvusmahttem­bálkáv

Sámedikke giellaarvusmahttembálkáv oadtju ulmusj guhti ednagit la barggam sámegielav bisodime, nannimin ja åvdedime.

Jane Astrid Juuso oaččui Sámedikki giellabálkkašumi

Jane Astrid Juuso bálgáv uddni Sámedikken oadtjoj.

Jane Astrid Juuso, Unjárgas, la rahtjam åvdedime sámegiela adnemav ja joarkedimev Unjárga suohkanin. Dajnas oadtju Sámedikke giellaarvusmahttembálkáv, diedet Sámedigge præssadiedádusán.

Juska sámegiella l bæjválasj giellan ållusijda Unjárgan, gåssuk la dætto vuolen sosiála aktijvuodan, gånnå dárogiella l ráddijiddjen.

Jane Astrid Juuso bargos baktu jådedime suohkana giellaguovdátjav, Isak Saba guovddáš, sávret la barggam åttjudime sosiála arienájt gånnå sámegiella vuoroduváj.

Dát la birástahttám mánájt, nuorajt, ållessjattugijt ja aj vuorrasijt.

– Jane Astrid Juuso l vájkkudam dasi, Unjárgan la buorre buorre ja vuogas giellaåvddånibme. Sån la bálkáv ánssidam måvtåstuhttemis nuorajt ja vuorrasijt sámegielav dåjmalattjat ságastittjat, javllá sámediggepresidænnta Vibeke Larsen.

Barggam giellaælládahttemin

Juuso la aj fágalattjat giellaælládahttemijn barggam dahkamin kursav “Váldáv gielam ruoptus/Jeg tar språket mitt tilbake”, mij dálla aj la anon Svieriga biele Sámen.

– Jane Astrid Juuso la tjadádam dakkir prosjevtajt bargonis suohkana giellaguovdátja jådediddjen, valla ietjas sávresvuohta la ednagit vájkkudam ådå giellaaddnijt måvtåstuhttemin ja rekruttierimin, javllá Larsen.

Bálkká l 50 000 kråvnå ja dájddadiploma mav Sven Niklas Blindh la dahkam, tjállá Sámedigge præssadiedádusán.

Gudát vuojtte

Sáme giellaráde vuododij giellaarvusmahttembálkáv jagen 2000. Dan maŋŋela la Sámedigge giellastivrra ja Sámediggeráde bálkáv vaddám.

Åvdep giellaarvusmahttemvuojtte li Æjgátjuogos Divtasvuonas jagen 2000, Giellajuogos Skánijs 2001, Harry Solhaug, Gáivuonas 2002, Sagka Stångberg, Dearnas 2009 ja Iŋgor Ántte Ánte Mihkkal/Ánte Mikkel Gaup, Guovdageainnus jagen 2013.