Beakkán rádioprográmma «Lønsj» loahpahuvvui odne. Maŋŋil badjel 1000 sáddaga leaba fuolaheaddji guovttos Rune Nilson ja Torfinn Borkhus gergosat bargat juoidá eará.
Lønsj- doaimmahus bovdii odne olbmuid loahpahansáddagii Byscenenii, Troanddima gávpogii, boahtit geahččat ja gullat maŋimuš Lønsj- prográmma.
«Mahkáš-sápmelaš»
Prográmmas geasuhii erenoamážit okta oassi olbmuid, ja dat lei fiktiiva figuvra «Jan Olsen», gii vahkkosaččat searvvai sáddagii telefovnna bokte.
Lønsj-loahpahansáddagis riŋgii fuolaheaddji Rune Nilson rdaidda fásta figuvrraide, mat leat gullon rádioprográmmas.
Dás sáhtát gullat mo de manai Jan Olseniin, go searvvai maŋimuš geardde Lønsjii.
Logai iežas Olsenin
Prográmmafuolaheaddji Nilson lei ovdagihtii hirbmadit illudan loahpahansáddagii.
Odne sáhtii Nilson viimmat mieđihit duohtavuođa, jus lea eahpádus – son lea Jan Olsen.
– Lea erenoamáš somá go muhtumat eai diehtán ahte mun nekten dán figuvrra, dadjá Nilson.
Sihke suhttadan ja illudahttán
Figuvra Jan Olsen lea sihke guoimmuhan ja suhttadan olbmuid, dan viđa jagis go lea gullon rádios.
Olsen lea ožžon sierra doarjunjoavkku Facebookas, danin dadjá Nilson ahte sáhtii maiddái geahččaladdat eanet Jan Olseniin.
– Mun dusten eanet fanahallat rájiid, go dihten ahte sápmelaččat ieža liikojit Jan Olsenii, dadjá Nilson ja giitá guovdageaidnulačča gii álggahii Jan Olsen fan-joavkku.
Muhto guldaleaddjit leat maiddái moaitán NRK, earret eará danin go figuvrras lea heajos dárogiella.
Boađát go don váillahit Jan Olsena? Dáppe sáhtát gullat (eksterna liŋka) daid osiid mas Jan Olsen lea gullon.