Jan Morten Simonsen Utsi lea čiegusvuođas duddjon johkafatnasa, veahki haga.
Son lei ohcan johkafanaskursii, muhto go bargu ja kursa leigga seamma áigge, de ii heiven searvat kursii.
Diibmá son álggii ieš duddjot fatnasa. Dan son dagai oahpu ja bagadeami haga.
Dál lea bidjan fatnasa johkii, ja dadjá ahte áigu jođáneamos lági mielde fitnat luosaid bivdimin.
Ožžon jo diŋgojumi
Fanasčeahppi Johan Anders Bær oaivvilda ahte dál lea Kárášjogas ođđa fanasduojár.
– Dál ožžot olbmot diŋgogoahtit fatnasa Jan Mortenis. Mun gal lean juo dahkan dan, dadjá son.
Dadjá vel ahte Jan Morten lea viehka searas olmmoš, go fatnasa ii leat beare beare ráhkadit.
Go Jan Morten bijai fatnasa johkii, de geavai das mas balai. Fanas luoitá čázi.
– Ii leat nu ollu čáhci, veahá gal galgá! Soaitá ahte diet veahá lea stevveliid mielde boahtán, čaibmá Jan Morten.
Gárvves fanas veahkkin
Utsi lea álo liikon garradujiin bargat, ja lea máŋga jagi bargan snihkkárin. Son mieđiha ahte jus ii livčče dát máhttu, de ii livčče nagodit duddjot fatnasa.
Son ráhkadišgođii fatnasa dalle go oaččui rávvaga mo sojahit fanasnjuni. Das rájes lea ieš okto duddjon.
– Ii leat dus leamaš girji maid geahčat?
– Gávdno bat dat? In mun gal leat oaidnán, čaibmá Utsi.
Áidna veahkki mii lea leamaš, lei gárvves ráhkaduvvon fanas, maid son ain duos dás geahčastii, lohká son.
Duđavaš fatnasiin
Utsi muitala ahte lea muhtomin leamaš lossat bargat, go ii álo leat leamaš duđavaš.
– Muhtin beivviid orru mannan logi lávkki ovddas guvlui. Maŋit beaivve fas 15 lávkki maŋos, go ii šatta duđavaš buktagiin.
Son dadjá ahte lea duđavaš fatnasiin, muhto son oaidná dieđusge juoidá maid sáhttá buoridit.
– Dat lea nu smávva detáljat, ahte don fertet diehtit dan birra ovdal go oainnát daid, dadjá son.
– Boahtte fanas šaddá vel buoret, dadjá Utsi.
Champagne-gásttašeapmi?
Jan Morten muitala ahte ii leat vel bidjan nama fatnasii, ja ahte ferte vuos geahččalit dan ovdal go bidjá nama.
– Áiggut go champagne cuvket fatnasa vuostá go bijat nama?
– In mun dan gal duostta. Jus ii cuovkan, de bilidan fatnasa ja de vuodju, son čaibmá.