Olga (26) vájvaj gå ittjij mige dassta sjatta

Vádne åhpadiddjijs ja bagádiddjijs la sivvan gå i mige sjatta oarjjel- ja julevsáme mánájgárddeåhpadiddjeåhpadusás. Fálaldahka mav Nuortta Univeritiehtta l måttijt jagijt plánim. Dan sadjáj boahtá åhpadus sáme profjlajn.

• Lågå: Ingen barnehagelærere kunne språket – nå jubler de for redningspakken

– Da lidjin vájves sága. Da lij má tjielgga sáme mánájgárddeåhpadiddjeåhpadus danna mij muv hulli. Juska dal pensum dán ådå fálaldagán ietján la geldulasj ja dågålasj, de dat dagáj nav vaj giehpep la munji ierit dáv válljit.

Dav javllá mánájgárddebargge Olga Gælok guhti niellja jage dás åvddåla fáhkagæhttjalimev tjadádij mánáj- ja nuorajbarggefágan.

Dálla barggá mánájgárden Bådådjon gånnå l sáme fálaldahka.

Gælok usjudaláj ådå fálaldahkaj álgget sáme mánájgárddeåhpadiddjeåhpadussaj. Valla dav åhpadusplánav vierttij Nuortta universitiehtta guodet, ja dan diehti de Gælok dálla iehpet.

– Stuorra massem la sáme mánájgárddijda ja iehtjádijda gudi dárbahi pedagåvgåjt sámegiela máttoj aj, sámekultuvrajn ja fágalasj máttoj, javllá Gælok.

Ávon gå New Amigos julevsámegiellaj boahtá

Åvdep plánajt guodám

Nuortta universitehtan la má oarjjel- ja julevsáme åhpadiddjeåhpadibme jådon. Plána lidjin aj sáme mánájgárddeåhpadiddjeåhpadusáv tsieggit. Dajt plánajt lij guodám.

Fálaldahka sjattaj farra åhpadus gånnå sámevuodav tjalmosti.

Vuostasjlektor Kristin Østrem Fløtten Nuortta universitehtan la måttijt jagijt dáv åhpadimev plánim. Sån subtsas lij juo vijmak ådå plánaj gærggam, ja lij juo oahppijt åhtsåmin dán åhpadibmáj gånnå máhtá åhpadimev gadtsat madi bargon la.

– Jáhkijma galgajma nahkat sáme mánájgárddeåhpadiddjeåhpadusáv ásadit, ja oattjojma de muhtem rádjáj dav njuolgadusáj tjadá. Valla de mierreduváj farra mánájgárddeåhpadiddjeåhpadus sáme profijlajn, tjielggi Kristin Østrem Fløtten. Fløtten de doajvvu nahki åhttsijt julev- ja oarjjelsáme guovlos dán ådå fálaldahkaj åttjudit.

• Lågå aj: Fra høsten er det ingen voksne i barnehagen som snakker Ella Sööfe sitt morsmål

Sáme åvdåsvásstádus

Egil Solli guhti l dekádna Nuortta universitiehtan barggá åhpadiddjeåhpadusán Levangerin. Sån dættot Nuortta universitiehtta ja fakultiehtta åhpadiddjeåhpadusán dåbddi dav åvdåsvásstádusáv mij la siján julevsáme ja oarjjelsáme giela ja kultuvra åvdås.

Solli subtsas åhpadimij birra majt jådedi, ja man tjielgas la sáme profijlla.

Solli la dajna aj dudálasj gå dát åhpadibme jåhtuj boahtá, ja javllá gå de dájna fálaldagájn álggi, de vuosedi man tjielgas åvdåsvásstádus le.

– Åhpadimev ásadit la hásstalussan gå lij gallegattja gejna lij julev- ja oarjelsáme giellamáhtudagá gudi aj máhtti dáv åhpadimev jådedit ja åhpadit. Dav ep nagá jur dálla. Valla álggep gåjt dájna mánájgárddeåhpadiddjeåhpadusájn sáme profijlajn. Mijá mielas la dát buorre álggo, ja hæhttup dáv suojmma ásadit nav vaj maŋŋenagi le vejulasj almma sáme mánájgárddeåhpadidjeåhpadusáv fállat, javllá Egil Solli.

• Lågå aj: – Det er en så stor dag at jeg ikke finner ord
• Lågå aj: Blir ofte bedt om å snakke norsk med barnet framfor samisk – Kjempeuheldig