NRK Meny

Iver Jåksii muitočájáhus

Gudnejahttin- ja muittašandihtii Iver Jåksa de bovdejit Davvi Norgga Dáiddaguovddáš, RiddoDuottarMusea, Sámi Dáiddaguovddáš ja Saviomusea dáiddáriid ráhkadit dáidagiid johtičájáhussii mii rahppo Tromsø kunstforening:s dán jagi.

Iver Jåks
Foto: Ođđasat / NRK

Artikkelen er flere år gammel.

Dáiddárat bovdjuvvojit ráhkadit smávit dáidágiid mat mo nu galget muittuhit Iver Jåksa dáiddalašvuođa. Dáiddárat válljejit ieža makkár ávdnasiin ráhkadit dáidagiid čájáhusii.

Jåks dáidda máŋggabealat

Iver Jåks dáidda guoskaha olu beliid nugo mat álgoálbmogiid ja stuorraservodaga gaskavuođaid, sámiid ja dážaid, árbevieruid ja ođđaáigásašvugiid. Su dáiddalašvuhtii gullá maid árbevirolaš duoddji.

Alladási dáidda

Iver Jåks dáidagiid árvvošallet alladási dáiddan sihke dáža- ja sámi dáiddaservodagain. Dán duođašta čájáhus maid Iver Jåks beasai lágidit Museet for samtidskunst og Riksutstillingen 1998. Su dáidagat lea buorit kvalitehttas, ja dáin oidno sihke árbevirolaš duoddji ja ođđaáigásaš oarjemáilmme dáidda.

Árbevirolaš ávdnasat

Son duddjui ja ráhkadii dáidagiiddis árbevirolaš ávdnasiin nugo bohccočuorvvis ja muoras, seammás váruhii son dáidagiiddis šaddamis árbevirolaš duoddjin.

Earalaganaš dáidda

Su 70-jagi ávvudoaluin dáddjui muhtin sártnis ahte su dáiddá lea earalagan. Earalagan danne go Jåks čájeha dáiddalašvuođastis ahte gulla unnitálbmogiid, ja ahte son kultuvrralaččat gullá olggobeallái majoritehtta álbmoga. Dáidabargguidis oktavuođas nagada son doalahit dáiddalašvuođas dakkár dásis ahte ii mase identitehtas.

Gudne- ja muitočájáhus

Dáiddáriin lea áigi cuoŋománu 20.beaivái sáddet dáidagiiddiset gudne-ja muitočájáhussii. Dáid sáddejit RiddoDuottarMuseai Kárášjohkii. Muhto čájáhus, mii lea johttičájáhus rahppo Tromssas borgemánus dán jagi. Čájáhus čájehuvvo olu guovlluin Norggas gitta jagi 2010 lohppii.

Dáidagat neahttačájáhusas

Iver Jåksa gudnejahttin- ja muitočájáhusa lea maiddai vejolaš oaidnit neahtas, go seammás go čájáhusráhpan lea Tromssas, de galgá maid leat vejolaš oaidnit čájáhusa interneahtas, nu čállá NORDNORSK KUNSTNERSENTER neahttasiiddustis.