NRK Meny
Normal

Dát norgalaš iskkadeapmi gávdno polskagillii – muhto ii fal sámegillii

– Easkka de imaštalan, dadjá sámegiel-áŋgirušši - gii áinnas fástidivččii skovvái, jos dat gávdnošii iežas eatnigillii.

Innbyggerundersøkelsen 2016

ISKKADEAPMI: Man čeahpit leat Norgga ásahusat bálvalit álbmoga? Dan jearrá Hálddašan- ja IKT-direktoráhta dán skovis, mas ovdasiidu dás oidno. Muhto sámegillii ii beasa lohkat gažaldagaid dahje dieđuid.

Foto: Direktoratet for forvaltning og IKT

Issát Sámmol Heatta

IMAŠTALLÁ: Mázelaš juoigi, girječálli ja sámegiel-áŋgirušši Issát Sámmol Hætta.

Foto: Åse Pulk / NRK

– Skovis jerret ahte leago olmmoš duhtavaš sin bálvalusaiguin. Skovi leat sii sádden várra miehtá Norgga, ja skovvi lea sihke girjedáro-, ođđadáro-, eaŋgalas- ja polskagillii.

– Mu dieđuid mielde leat mis golbma almmolaš giela Norggas, ja sámegiella han lea okta dain. Dalle mun imaštan ahte manne skovvi ii leat sámegillii.

Nu muitala Issát Sámmol Hætta.

Son lea okta dain Norgga ássiin geat leat ožžon skovi Norgga Hálddašan- ja IKT-direktoráhtas.

Skovvi lea oassi iskkadeamis, mas ulbmil lea iskat man duhtavaččat norggalaččat leat almmolaš ásahusaiguin.

«Sápmelaččat han máhttet dárogiela»

– Muhto don gal varra máhtášit dárogillii deavdit skovi?

– Jos nie galgá ákkastallat, de han sáhttá dien dadjat miehtá ahte «sápmelaččat han máhttet dárogiela». Dalle han dubmejuvvo sámegiella jápmimii. Nu han ii sáhte, fástida Issát Sámmol Hætta, ja joatká:

– Diet direktoráhta han gullá Norgga stáhtii, ja lea han vel almmolaš iskkadeapmi. Ja sámegiela galgá beassat geavahit seamma dásis go eará almmolaš gielaid Norggas.

Hætta mielas galggašii erenoamážit sáhttit vuordit sámegiel-skoviid mat sáddejuvvojit ássiide dan nu gohčoduvvon sámegiel-hálddašanguovllus. Hætta ruovttosuohkan Guovdageaidnu gullá hálddašanguvlui.

Olgoriikagielat ovdal sámegiela

Issát Sámmol Hætta fuomášuhttá ahte direktoráhta lea gal fuobmán eaŋgalasgilli ja maiddái polskagillii jorgalit skovi. Sámegielas gal baicce eai leat direktoráhta bealis beroštan.

– Easkka de imaštalan, dadjá Hætta.

Jon Todal

DOARJU HÆTTA: Sámi Allaskuvlla sámegiel-professor Jon Todal.

Foto: Liv Inger Somby / NRK

Sámegiel-professor Jon Todal lea ovttaoaivilis. Todal deattuha ahte go lea sáhka sámegielhálddašanguovllu ássiin, de galget dákkár iskkadeamit fállojuvvot maiddái sámegillii:

– Mii diehtit ahte leat logi suohkana mat gullet sámegiela hálddašanguvlui, ja dat lea hui álki dáidda suohkaniidda. Dat ii leat váttisvuohta oppanassiige.

Todal ádde bures jos sámegielagat eai leat iskkadeapmái háliidan fástidit.

– Go juo eai oaččo skoviid iežaset gillii, de lea lunddolaš, lasiha.

Ávžžuha sáddet skovi ruovttoluotta

Kommunikasjonsrådgiver Harald Nyquist

UHCCÁN FÁSTIDA: Hálddahus- ja IKT-direktoráhta gulahallanráđđeaddi Harald Nyquist.

Foto: Direktoratet for forvaltning og IKT

Hálddahus- ja IKT-direktoráhtas čilgejit NRK:i ahte sii eai sáhte vel albmaláhkái fástidit, ja dáhttot buoret áiggi dasa.

Direktoráhta gulahallanráđđeaddi Harald Nyquist čállá gal liikkáge e-poasttas NRK:i ahte lea njealját geardde go čađahit dákkár iskkadeami almmolaš bálvalusaid hárrái, ja direktoráhta ii leat ovdalge almmuhan iskkadeami sámegillii.

Jon Todal ávžžuha sámegielagiid skovi sáddet ruovttuluotta direktoráhtii, vai direktoráhtas áddejit dárbbu ja gáibádusa sámegillii jorgalit čálalaš iskkademiid boahtteáiggis.

– Mun in leat gal dien iskkadeami oba rahpan ge, go das lea nu stuorra boasttuvuohta go sámegillii ii leat, dadjá Issát Sámmol Hætta loahpas.