Inna Marja illuda lávlut seamma lávddis go Keiino

16-jahkásaš Inna Marja Amundsen lea álo háliidan šaddat artistan. Dál son lea hui rámis ja njuikkoda vel iluin go Márkomeanuin galgá lávlut.

Inna Marja danser med kofta på seg. Dette er coveret til debutsingelen hennes «Elle».

NJUIKKODII ILUIN: Inna Marja lea nu movttet go beassá fas lávlut ruovttuguovllu festiválas.

Foto: Per Heimly

Inna Marja Amundsena ođđa šuokŋa almmuhuvvui bearjadaga, suoidnemánu 30. beaivvi. Lávvordaga son lávlu ges Márkomeanu-festiválas Evenáššis, Nordlánddas. Ja ieš lea earenoamáš ilus go su konsearta lea ovdal beakkán Keiino-joavkku konseartta.

– Mun njuikkodin iluin go jerre mu lávlut, ja nie stuora násttiid ovdal vel, dadjá Inna Marja.

Ođđa šuokŋa

Inna Marja Amundsen lea ovdal dulkon eará artisttaid lávlagiid. Dán háve son dulko lávlaga mii vuittii Sámi grand prixas 1991:s. Dalle lei Marit Hætta Øverli guhte lávllui «Jáddá go beaivi».

– Juste dál lean nu speanta, ahte liikojit go guldaleaddjit mu dulkomii dán SGP-lávlagis, dadjá Inna Marja.

Son čilge ahte buvttadeaddji DJ Ailo dat válljii dán lávlaga, ja ahte soai goappašagat leaba hui duhtavaččat dainna. Leaba ráhkadan dán boares lávlaga dakkár musihkkan man ieža liikoba guldalit - eanet ođđaáigásažžan.

Illuda gullat

– Mu mielas lea áibbas somá! Lea nu somá go nuorra artisttat ođasmahttet boares sámi lávlagiid, dadjá Marit Hætta Øverli. Su mielas lea vuogas ahte aittoálgi artisttat ná barget, jus eai leat ieža čálligoahtán ođđa lávlagiid.

Marit Hætta Øverli under Festspillene i Harstad 2021.

1991 VUOITI: Marit Hætta Øverli lea ilus go sámi musihkka ii vajálduvvo, muhto baicca ođasmahttejuvvo.

Foto: June Grønnvoll Bjørnback / NRK

Ieš ii leat Hætta Øverli lávlon dán lávlaga máŋgga jahkái, ja dál illuda gullat makkár su vuoitolávlla lea šaddan go nuorra musihkkarat dan leat heivehan.

Okto lávddis

Márkomeannu lea oahpes lávdi Inna Marjai. Son lea máŋgii lávlon doppe, muhto dán háve lea son áibbas okto.

– DJ Ailo, geainna lean ovttasbargan dál, ii beasa Ruoŧas Norgii pandemiija-njuolggadusaid geažil, čilge Inna Marja. Danne lea sus gárvvesbáddejuvvon musihkka man mielde lávlu.

Inna Marja på Márkomeannu scenen sammen med Intrigue.

INTRIGUE BOVDII LÁVDÁI: Inna Marja Amundsen muitá ain man stuora gudni dat lei juoigat ovttas Intrigue-joavkkuin 2018:s.

Foto: Marius Langstrand-Andersen

Nuorra artista muitala ahte sus dán háve lea eará dovdu, go dál son lea iežas namain searvame. Ovdal son lea lávlon ovttas earáiguin, dahje lea leamas guosseartistan lávddis.

– Dán háve mun gal lean hirbmat ollu hárjehallan, vai šaddá nu buorre konsearta go oba sáhttá ge, dadjá Inna Marja Amundsen.

Inna Marjja konsearta lea Márkomeanus lávvordaga diibmu 19.30. Ja go de lea geargan, de áigu ges návddašit Keiino-konseartta.

– Dieđusge ferten sin konseartta čuovvut. Sii han leat stuora násttit, ja mun liikon sin musihkkii, loahpaha Inna Marja.

Keiino

VÁLDOARTISTAT: Keiino leat dán jagáš váldoartistat Márkomeannu-festiválas.

Foto: Julia Marie Naglestad/NRK.

Nuoraid lávdi

Festiválahoavda Aili Guttorm dadjá ahte Inna Marja Amundsen lea bovdejuvvon danne go son lea nuorra márkosápmelaš artista.

– Márkomeannu han galgá addit nuorra áŋgirušši artisttaide vejolašvuođa čájehit máhtuset stuora lávddis, ja juste dán ánssáša Inna Marja, dadjá Guttorm. Son gohčoda Inna Marjja «up & coming» artistan, márkosámi ovddasteaddji geasa leat ollu vuordámušat.

Festivalsjef for Márkomeannu, Aili Guttorm, står på festivalområdet på SALT

DUHTAVAŠ HOAVDA: Aili Guttorm dadjá ahte lea lunddolaš válljet guovllu artisttaid Márkomeannu-festiválii.

Foto: Anders Boine Verstad / NRK

Festiválahoavda maiddái lea rámis go dán háve lea áibbas ođđa lávlla mii gullo sin lávddis.

– SGP Cover-prošeakta lea juoga masa Márkomeannu lea searvan, vai dohko besset searvat iešguđet guovllu nuorat, dadjá Aili Guttorm.

Dán jagáš festivála lea unniduvvon, pandemiija njoammuneastadeami geažil. Dás oainnát Márkomeannu 2019 prográmma (ekstern lenke) .