NRK Meny
Normal

Imaštallá go suolagálvvuid áigot skeŋket

Norgga Sámediggeáirras ja NSR jođiheaddji, Beaska Niillas oaivvilda ahte stáhtat eai sáhte lonohallát suolagálvvuid, maŋŋel go lea beaggán ahte Norggas árvvoštallet skeŋket Supmii ovtta várrečohká Ráisduottarhálddis.

Beaska Niillas

Sámediggeáirras ja Norgga Sámiid riikkasearvvi (NSR) jođiheaddji Beaska Niillas

Foto: Carl-Gøran Larsson / NRK

Dan čállá Yle Sápmi .

Beaska Niillas oaivvilda ahte dát várrečohká baicca galggašii skeŋkejuvvot sámiide, iige lonohallojuvvot riikkaid gaskkas .

100-jagi skeaŋkan

Háldi lea Suoma alimus várri, muhto dál lea nu ahte dat alimus čohká Ráisduottarhálddis lea Norgga rájiid siskkobealde. Lea árvaluvvon ahte Norga galgá skeŋket dan alimus čohká Ráisduottarhálddis Supmii go Suomas lea 100- jagi ávvudeapmi boahtte jagi.

(Ášši joatká gova vuolábealde)

Halti fjellet

Ráisduottar Háldi

Foto: Kent-Hugo Norheim / KUGO

Norgga stáhtaministtar Erna Solberg lea dál geahčadeame dán árvalusa mii álggos bođii Gáivuona suohkanis.

Muhto Norgga Sámiid riikkasearvvi njunuš gal imaštallá dán árvalusa.

– Dat lea vehá imaš árvalus, go rievtti mielhan dat lea sámi eanan. De dat geat juo leat rievidan dan eatnama, galget lonohallat gaskaneaset. Mun in leat gal bidjan nu olu návccaid, ahte beroštit dan áššis obanassiige, daningo rievtti mieldehan galggašii baicce nu, ahte dat geigejuvvo ruovttoluotta dasa geasa gullá, iige stáhtaid gaskkas lonohallojuvvo, dadjá Beaska Niillas Yle Sápmái.

– Vuoigatvuođat eai leat čielggaduvvon

Norgga Sámediggepresideanta Aili Keskitalo maid imaštallá dán árvalusa.

Sametingspresident Aili Keskitalo på Stortinget

Sámediggepresideanta Aili Keskitalo.

Foto: Kjell Are Guttorm/NRK

– Ferte várra muittuhit Norgga eiseválddiid, ahte Háldi lea guovllus, gos sámiid eananvuoigatvuođat eai leat vuos čielggaduvvon, dadjá Keskitalo Yle Sápmái.

Son lohká ahte sámit lea máŋga jagi vuordán ahte Norgga eiseválddit gakget lokte sámi voigatvuođačielggadeami dien guovllus, muhto ahte dát ii leat vuoruhuvvon.