Dan čállá
.Beaska Niillas oaivvilda ahte dát várrečohká baicca
.100-jagi skeaŋkan
Háldi lea Suoma alimus várri, muhto dál lea nu ahte dat alimus čohká Ráisduottarhálddis lea Norgga rájiid siskkobealde. Lea árvaluvvon ahte Norga galgá skeŋket dan alimus čohká Ráisduottarhálddis Supmii go Suomas lea 100- jagi ávvudeapmi boahtte jagi.
(Ášši joatká gova vuolábealde)
Norgga stáhtaministtar Erna Solberg lea dál geahčadeame dán árvalusa mii álggos bođii Gáivuona suohkanis.
Muhto Norgga Sámiid riikkasearvvi njunuš gal imaštallá dán árvalusa.
– Dat lea vehá imaš árvalus, go rievtti mielhan dat lea sámi eanan. De dat geat juo leat rievidan dan eatnama, galget lonohallat gaskaneaset. Mun in leat gal bidjan nu olu návccaid, ahte beroštit dan áššis obanassiige, daningo rievtti mieldehan galggašii baicce nu, ahte dat geigejuvvo ruovttoluotta dasa geasa gullá, iige stáhtaid gaskkas lonohallojuvvo, dadjá Beaska Niillas Yle Sápmái.
– Vuoigatvuođat eai leat čielggaduvvon
Norgga Sámediggepresideanta Aili Keskitalo maid imaštallá dán árvalusa.
– Ferte várra muittuhit Norgga eiseválddiid, ahte Háldi lea guovllus, gos sámiid eananvuoigatvuođat eai leat vuos čielggaduvvon, dadjá Keskitalo Yle Sápmái.
Son lohká ahte sámit lea máŋga jagi vuordán ahte Norgga eiseválddit gakget lokte sámi voigatvuođačielggadeami dien guovllus, muhto ahte dát ii leat vuoruhuvvon.