NRK Meny
Normal

Imašlaš vasáhusat rievssatbivdis

«Roasttilis bojá-guovttos» lea vuosttaš girji nuoraidromána-ráiddus, mas maiddái muitaluvvo neahkameahttumis fearániin. Inger Haldis Ápmir dat lea čálli.

Inger Haldis Ápmir

Inger Haldis Ápmir lea čállán nuoraidromána 'Roastilis bojá-guovttos'. Dán muitala leat leamaš somá čállit.

Foto: Anne Olli

«Roastilis bojá-guovttos» lea nuoraidromána maid Inger Haldis Ápmir lea čállán. Dán girjái lea Sámediggi bidjan almmuhanruđa. Girjjis leat guokte váldo-olbmo, soai leaba Bierril ja áddjá. Girječálli álggaha girjji das go 12 jahkásaš Bierril ja su áddjá leaba oahppamin rievssatgárddiid, soai leaba rievssatbivddus mealgat eret ruovttus.

Bierril vásiha imašlaš dáhpáhusa

Bierril vásiha imašlaš ášši, son dego gáikkihuvvo johtui ja fáhkkesta lea son áhku ja ádjá stobu olggobealde. Dan botta go lea doppe de dáhpáhuvvet issoras ja imašlaš áššit. Bierril dovdá iežas leat várálaš dilis, dovdá mo váibmu julká, ja son dovdá iežas leat heakka-heađis.

Nuoraidromána ráiddu čállá

Inger Haldis Ápmira nuoraidromána

Inger Haldis Ápmira nuoraidromána

Foto: Anne Olli

Girječálli Inger Haldis Ápmir muitala iežas čállit moadde girjji ain juo, dán ráiddus. Iežas muitala buoremusat čállit iđitbeaivve. Ihkku son juo čálligoahtá ja čállá gaskabeai-áigái. Ápmira mielas lea dán vuosttaš girjji leamaš hirbmat somá čállit, ja dál son lea čállimin nuppi, ja datge lea somás bargu.

Girjjis lea gelddolaš teaksta

Girječálli Inger Haldis Ápmir lea vuohkkasit hápmen girjji álggu, das juo hui álggus dáhpáhuvvá imašlaš ášši, go Bierril dego válddahallá fámuide mat dolvot su áhku ja ádjá ruktui. Doppe ges deaividit dakkáraš áššit mat dollet lohkki teavsttas. Lohkki ferte beare lohkat viidáseabbot danne go dáhpáhus mas čálli muitala lea nu gelddolaš ahte ferte beare lohkat vai beassá diehtit mo de geavvá Bierriliin.

Girjji lea ČálliidLágádus almmustahttán, dat lea juo gárvvis.