NRK Meny
Normal

Ilus go ii dárbbašan massit sámivuođas vaikko šattai biebmoruktui

Eva Jeanette Iversen lea biebmománnán leamaš fulkkiidis luhtte. Son lea ilus go dat fálaldat dávistii su sámevuođa ja sámegiela, ja go ii dárbbašan massit sámivuođas vaikko šattai biebmoruktui.

Eva Jeanette Iversen

Eva Jeanette Iversen lea biebmománnán leamaš fulkkiidis luhtte.

Foto: NRK Sápmi

– Dat lea dieđusge leamaš dehálaš. Mun lean dalle beassan fulkkiid ja iežan olbmuid luhtte bajásšaddat, eatni bealde.

Muhto su viellja ii lean seamma lihkolaš go šattai dárogielhálli bearrašii ja lea massán sámevuođas. Dan birra jurddašit šaddá lossat.

– Son lea dieđusge massán áibbas iežas giela ja dan...., lohká Iversen ja čirro. Son ii nagot šat eanet hupmat dán birra.

Dárbbašit eanet sámegielhálli biebmoruovttuid

Dakkár dillái gártetge sámemánát ain duos dás, go eai leat doarvái sámegielhálli biebmoruovttut. Muhto dilli sáhtašii buorránit jus eambbosat válddaše biebmománáid.

– Livčče gal vejolaš lasihit biebmoruovttuid logu, muhto de fertešedje olbmot ieža váldit oktavuođa, dadjá Finnmárkku biebmoruovttuidbálvalusa ossodatjođiheaddji Torbjørn Johansen.

Biebmoruovttuid ođđa stuorradiggedieđáhusas, mii almmuhuvvui mannan bearjadaga, leage mihttu lasihit biebmoruovttuid logu mánáid iežaset lagaš birrasis. Biebmoruovttuid váilivuohta lea oktasaš hástalussan buot davviriikkain, daddjo dieđáhusas.

Kárášjoga dearvvašvuođa - ja fuollahoavda Randi Johansen Paltto

Kárášjoga dearvvašvuođa- ja fuolahushoavda, Randi Johansen Paltto

Foto: Piera Balto / NRK

Geahččalit vuos máná birrasis ohcat biebmoruovttu

Mánáidsuodjalus lea guhká jo unnášan sámegielhálli biebmoruovttuid logu, muitala Kárášjoga dearvvašvuođa- ja fuolahushoavda, Randi Johansen Paltto.

– Ii leat čiegus ášši ahte leat álo menddo uhccán mánáidruovttut mat gokčet čearddalaš erenoamáš dárbbuid, leš dal sáhka sámemáná ektui dahje eará kultuvrii gullevaš máná ektui, de leat álo menddo uhccán dat ruovttut, dadjá Johansen Paltto.

Son muitala ahte gieldda mánáidsuodjalus geahččala álo vuos gávdnat čovdosiid máná birrasis, ja jus dat ii válgan, de manná diehtu stáhta ásahussii ahte dat fertejit eará sajis dalle gávdnat čovdosa.

– Máná vuoigatvuohta beassat iežas olbmuid luhtte bajásšaddat

– Mun jáhkán dat lea dan máná vuoigatvuohta ahte beassat iežas olbmuid luhtte jus lea vejolaš, lohká Eva Jeanette Iversen.

– Jus buohtastahtát iežat vieljainat, ja smiehtat iežat dili, maid don dajašit dan birra?

– Mu ja su ektui? Na, mun lean dieđus leamaš dat lihkolaš, vástida Eva Jeanette Iversen.

Geahča ášši maid otná Ođđasiin.