Sámi girječálli Kerttu Vuolab Deanuleagis suomabeal Sámis lea námmaduvvon Dávviriikalaš girjjálašvuođa bálkkašupmái romanain “Bárbmoáirras”.
Jorahallá dušše belggiid
Iežas muitala Kerttu Vuolab áibba hirpmahuvvan dainna go lea nammaduvvon bálkášupmái, danne ii sáhte ja máhte son vuos ii maidige bargat. Dál muitala iežas dušše belggiid jorahallat. Gudni dat gal lea go lea nammaduvvon, orru dego lottusde livččii vuoitán, dadjalasttá vel.
Muitalandáiddu oahpai mánnán
Kerttu Vuolab muitala iežas juo mánnán gullagoahtán máidnasiid, go dalle han olbmot máinnastedje. Das son varra hutká ja viežžá muitalusaid. Ja iežas navdá gal ain čállit eanet, go dát nammadeapmi han gal movttiidahttá, ja fuopmášahttá ahte juoga son gal máhttá.
"Barbmoáirras" lea fikšuvdnagirji
Girji "Barbmoáirras" lea fikšuvdnagirji. Dán sáhttá osiidmielde lohkat, maiddái mánáide. Iežas lohká girjjis lohkán jietnagirjin, de dan sáhttá gullat.
Ja dat ahte dál lea nammaduvvon dán bálkášupmái, dát diehtalasat mearkkaša ahte su girji jorgaluvvo eará gielaide maid. Ja dat lea sutnje vuoitun, go dalle han lea vejolaš eanebuin dan lohkat.
Dávviriikalaš girjjálašvuođa bálkkašupmi álmmuhuvvo cuoŋománu 12. b. 2011. Kerttu vuolab lea áidna sámi girječálli gii leat nammaduvvon dán balkkašupmái.