Dán vahku lea duojár Nico Ibaceta ovttasráđiid RiddoDuottarMuseain – Sámiid Vuorká-Dávvirat, Norges Husflidlagain ja Forbundet Kysten kulturorganisašuvnnain lágidan prošeavtta «Illut Govddodit» Kárášjogas. Ovttas sii háliidit nannet ja suddjet árbevirolaš dujiid.
13-jahkásaččas lea miella bargagoahtit dákkár dujiiguin
Nuoramus kursa oassálasti lea 13-jahkásaš Torunn Johansen Norvang, lohká kurssa leamaš duođaid gelddolaš ja lea oahppan olu.
– Lean oahppan ahte kajáhkka sáhttá stripset ja liibmet, ii ge dušše geavahit skruvaid ja spihkáriid, muitala Johansen Norvang.
13-jahkásaš liikui kursii, mas beasai oahppat duddjot dákkár árbevirolaš duoji, ja livččii miella bargagoahtit giehtadujiiguin.
– Mus lea hui miella geahččalit. Ja dieđusge eambbo kurssaide. Mus lea measta miella dán álgit bargat, lohká Johansen Norvang.
Miellagiddevaš prošeakta
Inka Rauhala oassálastá maiddái Illut Govddodit -prošektii. Su mielas lea kursa bures ordnejuvvon, ja lea dego bihttáspealu bidjat oktii go muhtin bihtát leat juo gárvásit ráhkaduvvon. Manne son háliidii oassálastit kursii lea go sus lea beroštupmi fatnasa duddjonteknihkaide.
Rauhala lohká ahte árbevirolaš giehtaduodji geasuha su vaikke vel dán kajáhkkaduddjon-kurssas geavahedjege gárvásit ráhkaduvvon osiid. Ja dieđusge leat sus alla vuordámušat maŋimuš kursabeaivái ahte fanas govdu jogas.
– Mun jáhkán ahte fanas jeahká čázi, muitala Inka Rauhala.
Duojár ballá árbevirolaš giehtaduoji jávkagoahtit
Nico Ibaceta lea kursajođiheaddji ja boahtá Chiles. Son lea kajáhkkaduojár gii hábme ja duddjo iešguđetlágan kajáhkaid Chile ja Ruonáeatnama eamiálbmogiid kajáhkkahámiid vuođul.
Áigumuš kurssain lea movttiidahttit nuorat buolvvaid bargagoahtit giehtadujiin, go dat orru jávkagoahtimin dál, oaivvilda kursajođiheaddji.
– Lea dehálaš lágidit dákkár kurssaid go ođđaáiggis orru giehtaduodji measta vajálduvvamin. Ja geahččalit váldit ruovttoluotta árbevirolaš dujiid, mat leat dehálaččat servvodahkii, muitala Ibaceta.
Nico Ibaceta sávvá ahte kajáhkka govdu jogas go gerget duddjomis, ja seammás sávašii ahte árbevirolaš giehtaduodji oažžu stuorát fuomášumi amas vajálduvvat.
Plastihkkafoliein galggašii kajáhkka govdut čázis
Kurssas duddjoje guokte kajáhka, nuppi kajáhkkii jorahedje plastihkkafolie miehtá mii galggai dagahit ahte kajáhka govdu.
Sámiid Vuorká-Dávviriid museajođiheaddji, Jelena Porsanger eahpidii go álge bidjat folie miehtá kajáhka, ii ge lean jáhkku ahte kajáhkka galggai govdut čázis dainna.
– Lei measta nu ahte mun in jáhkkán go oidnen dat álge birra bidjat dan plastihka. Mun in jáhke ahte dat boahtá doallat, muhto dál han mii beassat oaidnit govdo go, lohká museajođiheaddji.
Govdu go kajáhkka jogas, vai ii?
13 jahkásaš Torunn ii lohkan bállen oađđit dáid beivviid go leamaš nu speantta, ja lea illudan geahččat jeahká go kajáhkka čázi.
Kárášjoga sáttogáttis ledje buohkat nu speanttat geahččat govdu go kajáhka, vai vuodju go.
Torunn Johansen Norvang ja kursajođiheaddji Nico Ibaceta, beasaiga geahččalit kajáhka jogas.
Go viimmat čájehuvvui ahte kajáhkat govdduiga, de álge buohkat sáttogáttis speaddjut gieđaid ja rámidedje kursa barggu.