Dagblad-áviissa árvvoštalli, Øyvind Rønning, ii loga gal vuogasin go Mari Boine lávlu eŋgelasgillii – Boine massá veahaš iežas erenoamášvuođa, massá ovttaláhkái vuoimmi ja givrodaga. Dasa lassin šaddá son dego dat earát, anonyman, čállá Rønning.
Rønning lohká ahte ii leat nu mo leat hárjánan gullat su go lávlu sámegillii. Boine jietna lea dego instrumeanta go lávlu sámegillii ja eŋgelasteavsttat leat jorgaluvvon skearrus. Dán ođđa skearrus lea dušše okta sámegiel lávlla "Adine ja Isak" ja sámi dajaldagat guovtti eará lávlagis, main vuhtto su iežas šuokŋa ja leahttu, ja main gullat Mari, lohká Rønning.
Mari Boine almmuhii iežaš vuosttaš eŋgelasgielat skearru mannan bearjadaga. Áviissat árvvoštallet skearru iešguđet čalmmiiguin.
Foto: Mette Ballovara / NRKLávlu eŋgelasgillii, illudahttá guldaleddjiid
Aftenposten-áviissa árvvoštalli Svein Andersen oaivvilda ahte Mari Boine ja su eŋgelas skearru boktá olbmo musihkalaš áŋgirvuođa. "She the Woman" lea erenoamáš buorre mas lea olu meditašuvdna ja mystihkka. Musihkka geasuha olbmo musihkka imáštallama. Skearru muitala čájeha goargadis nissonolbmo mátkki.
Mari Boine lea hárjanan lávlut sámegillii, 32 jagi. Dál almmuhii vuosttaš geardde eŋgelasgillii skearru, ja go juo ná lea dahkan, de dat čájeha su duostilvuođa. Skearrus vuhtto gii son lea popjienat bokte. Seammas gullat su duogáža lávlagiin, gos oassi lea sámegillii. Lávlagat gullojit vuollegis jienain. Seammas lea leahttu ja dovdan su erenoamaš lávlunvuogi. Dát láidesta guldaleddjiid iešguđetlágan muitalusaide, lohká Andersen.
