NRK Meny
Normal

Illuda nammademiin, muhto ii jáhke vuoitit

Veikko Holmberg girji «Duvro-guovža ja skohtermáđii» lea nammaduvvon Davviriikkalaš mánáid- ja nuoraid girjjálašvuođabálkkašupmái 2015. Girječálli illuda go lea nammaduvvon bálkkašupmái, muhto ii navdde iežas gal oažžut bálkkašumi.

Veikko Holmberg
Foto: @Michal Aase

Girjjis čállá son mánáide gelddolaš muitalusa, muhto vuođđun muitalusii lea go unnitálbmogat álo šaddet čáhkket saji stuorat álbmogiidda.

Váikke dal čállá mánáide ja nuoraide, de lea dán girjjis sáhka duođalaš áššis, mas čálli čájeha mo máilmmi unnitálbmogiid eatnamat unnot aht unnot, go stuorát álbmot dađistaga oasážiid mielde váldá álgoálbmogiid eatnamiid.

Guovžžat muitalit muitalusa

Veikko Holmberg girji

Veikko Holmberg girji mii lea nammaduvvon Davviriikalaš mánáid- ja nuoraid girjjálašvuođabálkkašupmái

Foto: Davvi Girji

Girjjis muitala čálli mo Duvro-guovža ja su čivga Dárvu ferteba ruovttuska guođđit ja fárret eret, go olbmot dárbbašit saji iežaset astoáiggedoaimmaide. Duvru ja Dárvu vuostálastiba dáid doaimmaid, muhto de álggahit guovžabivddu ja bivddáskit sutno.

Lihkus bohtet muhtumat guovžžaide veahkkin - muhto soaitá leat dattetge sadji sihke guovžžaide ja olbmuide.

Nammadeapmi illudahttá

Veikko Holmberg illuda go su girji lea nammaduvvon girjjálašvuođabálkkašupmái, muhto ii navdde iežas gal olahit dán bálkkašumi. II jáhke ahte dál dal juo olaha sápmelašgirji bálkkašumi, vaikke dal leat juo gollan moaddelot jagi das rájes go Áillohaš bálkkašuvvui Davviriikalaš girjjálašvuođabálkkašumiin.

Sissel Horndalen lea sárgon govaid girjái, ja Davvi Girji lea almmustahttán Veikko Holmberg gijji sáme- ja dárogillii.