Neeta Jääskö lea okta guoktenuppelohkái oasseváldis Sámi Grand Prix juoiganoasis, mii odne eahkes lágiduvvo Guovdageainnus.
Vuosttaš geardde lávdde alde
Jääskö, gii lea Anáris eret, áigu livđut iežas unna oappáža Ninni Jääskö. Livđun lea anáraččaid árbevirolaš juoiganvuohki.
– Dát lea min iežamet árbevierru maid mii galgat áimmehuššat. Mis lea unnan liđvejeaddjit Anár bealde, ja vaikko mun in vuoittášii ge, de mun manan goit lávdde ala ja ja dat gullo vaikko miehtá máilmmi. De besset oaidnit ahte dát maid dohkke lávdde ala, áibbas seammaláhkái go earát ge, lohká son.
Lea vuosttaš geardde go lávke lávdde ala dego artistan.
– In leat ovdal juoigan almmolaččat, mánnán dieđusge skuvllas, muhto dat ii rehkenastto, bohkosa son.
Illuda eahkedii
Lassin juigiide, de leat maid guhtta artista mielde SGP lávlunoasis.
Sámi musihkkafestivála dat lágida Sámi grand Prix ja buvttadeaddji Nils Johan Vars illuda eahkedii.
– Mii leat jo bures ovdagiitii vuovdán billeahtaid ja jáhkán ahte šaddá áibbas dievva Báktehárjjis odne.
Dasalassin sáddejuvvo SGP maid neahttas, gos geahččit sáhttet leat mielde jienasteame.
– Ođas dán jagi lea ahte geahččit Báktehárjjis maid besset jienastit mentometeriid bokte, lohká Vars.
Čuovvovaččat leat mielde Sámi Grand Prix 2016 juoiganfinálas:
Johan Mikkel Bueng (Oassefinála vuoiti Norggas)
Neeta Jääskö (Oassefinála vuoiti Suomas)
Per Nilsen Bueng (Áltá)
Mathis Ole Vars (Vuohčču)
Nils M. Sara (Guovdageaidnu)
Nils Lars Eira (Kárášjohka)
Johan Ivvar Gaup (Máze)
June Brita Eira (Guovdageaidnu)
Ravna Anti Guttorm (Skoganvarre)
Issat Sammol Hætta (Máze)
Johan Anders Bær (Kárášjohka)
Marit Inga Sara Pettersen (Áltá)
Čuovvovaččat leat mielde Sámi Grand Prix 2016 lávlunfinálas:
Gájanas (Anár/Ohcejohka)
Janne Eilen Mienna Guttorm (Guovdageaidnu/Romsa)
Ivan Andre Skum (Máze)
Ella Marie H. Isaksen (Deatnu)
Axel Ánte (Máze/Sarpsborg)
Marit Susanne Utsi (Guovdageaidnu)