Bivdoregulerenčoahkkin dat árvala ahte rabas joavkku fatnasat ja gitta joavkku fatnasat Finnmárkkus, Davvi-Romssas ja eará mearrasámi gielddain, galget oažžut seamma ollu dorskeeari boahtte jagi.
Rabas joavkku bivdit leat lotnolasealáhusolbmot ja earát geain mearrabivdu lea oassi tietnasis. Gitta joavkku bivdiin ges lea mearrabivdu áidna tienasvuohki, ja sii leat dássážii ožžon sullii beali stuorát dorskeeari go rabasjoavkku bivdit.
Lotnolasealáhusbivdi Sverre Pedersen, Ráttovuonas Nuorta-Finnmárkkus, eret, illuda. Su bivdoearri lassána 30 tonnas 50 tonnii.
– Lassáneapmi addá lagabui 300.000 ruvnnu eambbo tietnasa. Dieđusge dat addá ollu buoret vejolašvuođaid go dálá ortnet, sihke tietnasa, investerema ja rekrutterema oktavuođas, Pedersen lohká.
Guolástusministtar ferte dohkkehit
BUORRE DOAIVVA: - Mus lea stuorra jáhkku ahte guolástusministtar Elisabet Aspaker dohkkeha Regulerenčoahkkima árvalusa, lohká sámediggeráđđi Silje Karine Muotka (NSR).
Foto: Nils Henrik Måsø / NRKDattege Pedersen ii duostta vuos áibbas illudit. Guolástusdepartemeanta dat galgá loahpa loahpalaččat mearridit ahte galget go rabas- ja gittajoavvku fatnasat oažžut seamma stuorra dorskeeari.
Sámediggi dat lea ovttas Bivdin – mearrasámi bivdoorganisašuvnnain dorron ášši ovddas. Sámediggáráđđi Silje Karine Muotka lohká alcceset leat buorre doaivva oažžut departemeantta dohkkehit árvalusa.
Guoská ollu fatnasiidda
Guolástusdirektoráhta ii dieđe vuos man ollu fatnasiidda ođđa ortnet guoská. Muhto Nordlánddas, Romssas ja Finnmárkkus leat dál sullii 700 rabas joavkku fatnasa mat leat vuollil 11 mehtera. Daid gaskkas gullet 500 fatnasa Finnmárkui.
